Thlantlin hmeichhiaten dan an zir

Thlantlin hmeichhiaten dan an zir
Mizoram State Legal Service Authority leh All Mizoram Women Elected Representative tangdun chuan Zirtawpni khan Aizawlah inthlanpuia thlantlin hmeichhiate tan ram leh khawtlang hruai hna an thawhna kawnga dan an hriat tur an hrilh.
Hmanpuitu chief minister Lalduhoma chuan, ram leh khawtlang hruaitu chu dan hnuaia hna thawk tur a ni a, dan a hriat ve a ngai thin tih a sawi a. Dan hriatna lama mi a bengvar tawk loh chuan dan kalha thusawi emaw hma lak mai a hlauhawm a, mipui chanvo humhalh kawngah leh inrelbawlna langtlang leh huapzo kalpui theihnan a tangkai tih a sawi.
“Hetiang lam training hi thlantlin hmeichhiate chauh ni loin, kan zavaia kan mamawh a ni. Dan thar a lo chhuak thin a, tunhnaiah pawh dan thar engmawzat India ramin kan nei a. Heng dan thar hi kan lo hmelhriat ve thuai thuai a tul thin,” a ti.
Thlantlin hmeichhiate chu hmeichhia zawng zawng aiawhtu an ni tih chief minister hian sawiin, hmeichhiate tih chakna leh an hamthatna lama hmalaknaah pawh sawrkar tibengvartu ni a, a tulna apianga hma la turin sawrkar a inkau reng tih a sawi a ni.
All Mizoram Elected Women Represenratives president R Zomuanpuii chuan Mizoram chanchina dai tawh lo tur, Mizoram state cabinet minister atana hmeichhia dah hmasa bertu Pu Lalduhoma chu an chhuang a, a thil tih hian hmeichhiate a tilawm tih a sawi.
MSLSA member secretary Vincent Lalrokima chuan MSLSA hmalakna a sawi a. A mamawhtu mipui tanpui turin an inpeih reng tih a sawi a ni. Chawhnu lamah thupui thlan chhuah pali hmangin dan zirho a ni.