CM-in House leader nih tlin lo – C Ngunlianchunga

CM-in House leader nih tlin lo
– C Ngunlianchunga
Chief minister Lalduhoma chuan Assembly House chhungah leader nih a tling lo nia a hmuh thu Congress MLA C Ngunlianchunga chuan a sawi.
Zirtawpnia Congress Bhavan-a inkhawmah MPCC vice president ni bawk C Ngunlianchunga chuan, House leader-in mawhphurhna sang tak a nei a, Assembly House-ah pa ber chan a chang thin a, tuna chief minister chuan House-ah pa ber nih a tlin lo nia a lan thu a sawi.
“Opposition member-te hi hmaisa chungin lokal pawh nise, House leader chuan a lo ti dai tur a nih laiin, a ni chuan a lo tihsat belh emaw tih tur a ni. Keima chungchangah pawh ka thiam leh thiam loh chu thudang ni se, kalphung pangngaiah chuan, CM khan min ko se, hei, chuti khati chu a ni a, tiin min sawipui se, chu chu mi puitling zia a ni,” a ti.
Mizoram Youth Commission Bill chungchangah repeal loa, amendment anga kaltir a tha lo em ni tih an sawi a. Chief minister-in audit theihna dan mumal awm loa a sawi leh, duh duh dana hna lak leh sum hman a ni tih a sawi khan, audit theihna a lo awmsa a, gazette-ah hial chhuah a ni tih document nen pho chhuah a ni a. Speaker hnenah House property atan hlan niin, speaker hian House-ah a chhiar chhuak a. Amah (CM) ngeiin House-ah MYC audit vawihnih neih a ni tawh tih a sawi leh niin Congress MLA hian a sawi.
“A minister-ten a thusawi dik loh zia House-ah an pholan sak kha thil zahthlak tak a ni a, kalphung tha lo tak a ni. A minister leh MLA-ten no-confidence motion an pulut ang a ni,” a ti.
Sum awm tamna portfolio chang lo tura insawi khan a pumhmawm hmak hmak niin chief minister a puh a. Sum tamna department nia lang chu CM portfolio chan turah sawn zel a ni tih a sawi.
Assembly House-ah treasury bench lamin MNF member-te an ti khawngaihthlak hle niin C Ngunlianchunga hian a sawi a. Zawhna an zawhin an zawhna chhang loin a zawttute an chirhtheh chiam zel a, a parliamentarian lo em em a, a zahthlak hle tih a sawi.