Thlavang hauhna kawngzawh …

Manipur-a kan unau Zo hnahthlakte harsatna tawh mek hriatpuina leh tawrhpui nan karleh July ni 25 hian Mizoram pumah “Zo hnahthlak unaute thlavang hauhna” kawngzawh huaihawt ni se tiin NGO Co-Ordination Committee chuan a rel a. Kawngzawh ni hian Mizoram chhunga in tinah Puan dum zar theuh turin NGO Co-ordination Committee chuan a ngen a. Sawrkar hnathawk, zirlai, sumdawngte leh lirtheia eizawngtute pawh kawngzawhnaah hian an hna tulte kalsana tel theuh turin NGO Co-Ordination Committee chuan a ngen a.
Kan thenawm lawka kan unaute tawrhna hian Mizoram mipui leh Mizoram pawn lam ram hrang hranga Zo hnahthlak zawng zawngte rilru a ti na ngawih ngawih a, mahni theihna zawn theuhvah tawrhpuina leh tanpuina pawh a luang khawm ve mek a. State dang sawrkar thuneihna hnuaia thil thleng mek a nih avangin, a hring a hrana an state chhunga iptepuia chempui ak chunga zuan luh a rem meuh si lo va, ha chang thialin ralkhat atangin kan lo vei tawn ve sek a ni ber.
Tuna thlavang hauhna kawngzawh neih tur pawh hi, boruak lian tak siam thei tur leh, sawrkar laipui rorelna bang beng ri thei khawpa thawm neih len a pawimawh dawn hle a, chuvangin, mipui pawhin kan unaute tan tha kan thawh ve theihna pakhatah ngaiin thahnemngai taka kawngzawh hi kan thlawp thiam a paeimawh dawn hle a ni.
Manipur-a thil thlen dan leh buai dan hre reng chunga ni 70 chuang ngawih chuh tlat Prime Minister Narendra Modi pawhin, Manipur tlangmi hmeichhe pahnihte chunga rawng tak leh rapthlak taka thil a thlen dan a hriatin, nâ a tih thu leh thinrimthlak a tih thu a sawi chhuak ve ta a.
He thil thleng hi mihring hlutna leh zahawmna tih bawrhbanna rapthlak leh nunrawnna tawpkhawk a tling a; video-a kan hmuh angin, mipuiin chhanchhuah tum pawh ni lo, hmuhnawm thlir taka thlir chunga an han zui dul dul thei te pawh kha, mak tak a ni. Khatiang meuh thil thleng a hriat hnu pawha prime minister hi la ngawi reng thei a nih ngat chuan, thil sual titute ‘support’ ang hiala ngaih a ni ngei ang. He thil thleng hian India a ti thinrim mek a ni.
Supreme Court pawhin he thil hi na taka demin, ‘constitution hlawhchhamna’ tiin Chief Justice of India pawh a tawng chhuak hial a; sorkar chu rang taka hma la tur leh an hmalak dan hrilh hre nghal turin a ti nghal a; ‘July 28 ral hmaa hmalakna a awm lo a nih chuan Supreme Court-in chet a la ang’ a ti hmiah tawh a ni.