Thlawhna chesualah Wagner Group hotu lu Yevgeny Prigozhin thi

Russian state-ruin news agencies te chuan Wagner group chief Yevgeny Prigozhin chu thlawhna chesual passenger zingah a tel ngei tih an sawi a. Thlawhnaa chuang dam chhuak an awm loh avangin Prigozhin pawh a thi ngeia ngaih a ni.
“Tver Region-a thlawhna tlaa chuang zingah Yevgeny Prigozhin pawh a chuang tel ngei a ni,” tiin TASS news agency chuan a tarlang a.
“Thlawhnaah hian mi 10 chuangin an zingah crew member 3 an awm a. A lan danah a chhunga chuangte an thi vek a ni,” tiin Russia ministry for emergency situation chuan a sawi zui bawk.
He thlawhna mimal ta Embracer Legacy aircraft hi Moscow atanga Saint Petersburg pan niin Tver Region a Kuzhenkino khua hnaihah a tla a ni.

Lawm leh huat hlawh Prigozin
June thla tawp lama helna chawkchhuaka Moscow an pan atang tawhin Yevgeny Prigozhin chu Russia watchers te chuan ‘dead man waling’ tiin an sawi sa tawh.
Mercenary boss dam rei hun chhung tur chungchangah CIA Director William Burns meuh pawhin a hma in, “Prigozhin chu ni ila ka food taster ka ban kher hauh lovang,” tiin a sawi tawh bawk a.
Yevgeny Prigozhin chuanna thlawhna chu vansanga a awm laia a chetsualna chu tihluih leh Kremlin phuba lakna pawh lo ni ta se, Russian history ah chuan ‘special military operation’ turu tak anga sawi a ni reng dawn.
Prigozhin hi misual lung in tang hlui, chef leh hot dog zuar atanga mercenary boss ni thei niin Wagner mercenary army leh a piahlam thlenga ngaisangtu nei ngah a ni. Thla hnih kalta khan Moscow laka helna chawkchhuakin Rostov-on-Don mipuite chuan nasa taka an lo lawm tawh a ni bawk.
Chutihrualin Moscow ah erawh hmelma a ngah hle a, a bik takin Russian military hotu lawk te nasa taka mipui nawlpui hriata a sawisel te chuan an lawm lo hle thung.
Prigozhin tihsual lian ber chu 23 June-a Moscow pana President Putin kalha kawngzawha chet a la kha a ni. Putin hming chu sawi lang lo mahse Prigozhin chuan February 2022 a Ukraine Russia in a run chungchang a sawi danah Kremlin chu a tilawm lo takzet a ni. Russians te hnenah Prigozhin chuan bumin an awm tiin a puang hial a. Moscow panin a sipaite a kalpui zui chu Putin meuh pawhin video message tichhuak hialin Prigozhin chetlak dan chu phatsanna leh hnung lam atanga invihna tihialin a sawi bawk.
Vladimir Putin chuan amah phatsantu a ngaidam ngai lo va, amah chotute pawh a ngaidam ngai hek lo.
Russian intelligence officer a hnua defector-a tang ta Alexander Litvinenko pawh kum 2006 daih tawh han London khawpuiah damdawi Inah radioactive Polonium-210 hmanga hrai a nih hnuah muangchangin hrehawm tak tuarin a thi tawh a ni.
A hnuah Litvinenko thihchhan chhuichian a nihnaah amah tura hraina chu Russia sorkar laboratory atanga lak ngei chutah chauh chuan awm a ni an ti a. Moscow erawh chuan Litvinenko thahnaa inhnamhnawiha puh mi pahnihte chu a hum tlat thung.
Chu mai bakah Russian KGB officer Britain-a tlanchhe tho Sergei Skripal a awm bawk a. Kum 2018 khan amah leh a fanu Yulia te chu Britain-a a an chenna Salisbury a an in kawngkhar vawnnaah GRU Russian military intelligence officer te chuan Novichok nerve agent tatin tihhlumin an awm lo chauh tawh bawk a. Chhui chian zuinaah thenawm lawka Novichok chenna perfume bottle chu hmuh niin a hmutu local Wiltshire a cheng Dawn Sturgess chuan a kutah a tah hnuah a thih phah zui a ni.
Russia ram chhungah pawh sawiseltu sumdawng lian te chu mak tak takin an thi fo bawk a, a then te chu mak tak maiin an inchhung step ah te an lum hlum a. President Putin sawiseltu langsar ber Alexei Navalny dik lo taka puha lung in tantir mek bawk kum 2020 khan Siberia pana an thlawh laiin Novichok bawka hraihlum tum niin Berlin panpui zui niin vanneihthlak takin a dam khawchhuak hlauh thung.
Mahse Prigozhin erawh a danglam thung a, chuvang tak chuan a thihna chuan hlet a nei ngei tura ngaih a ni bawk a. Kremlin tana mi pawimawh em em niin Russian tam tak tena national hero anga an ngaih a ni bawk.
Kum 2014-a Wagner goup of mercenaries a din te chu Russian Speznaz (Special Forces) operatives tha leh sipai dangte intelkhawmna a ni a. Eastern Ukraine-ah pawh Ukrainian army te Bakhmut atanga nawrchhuaktute niin Russian lung in tang pawngsualtu, tualthattu te sipai atana lain Ukraine indona hmatawnga hman an ni.
Wagner te hi Syria-ah pawh kum tam tak bu khuarin an awm tawh a, Africa-ah phei chuan Kremlin tana hlawhtlinna pawimawh tak tak thlen tawhtu an ni bawk a. Africa-ah hian sumdawnna turu tak kalpui tel bawkin Africa-a dictator tena an lawm leh duh em em an ni bawk.
Africa-a VIP te chu ‘security services’ him tak pein anmahni sawiseltute dahtha bawkin chumi lawmmanah chuan mineral rights te neiin gold leh metal pawimawhte chu African ram atangin an thiarchhuak thung a ni. Chung sum te chu Moscow-ah let leh vekin hausak pui nana hman a ni a, a tuartu ber te erawh an laksak ram an hruaitute an humhim te chu an ni thung.
Wagner te hi human rights bawhchhiatna tam taka mawhphurtu tia puh niin Mali leh Central African Republic-ah phei chuan mi tam tak tihlumtu a puh an ni a. Tichung chuan French leh western forces dang te chuan African continent zau tak atangin an nawrchhuak thei tlat a ni.
Tichung chuan Moscow lamah erawh military intelligence hruaitu lawk te chuan Prigozhin chu an tei thei lo thung a, nakin zela Putin tan pawha la hlauhawm thei tura an ngaih a ni thung.
Thlawhnaah tutu te nge chuang?
Thlawhna chhungah hian Prigozhin bakah a mi rin ber Simitry Utkin pawh a chuang tel bawk a.
Prigozhin thiantha ber Valeriy Chekalov, kum 2000 atang tawha Wagner leader nena insihnai reng chu a chuang bawk a. Chekalov hi Wagner logistics in-charge niin Wagner te ei leh in tur te oil production leh agriculture lama an hmalakna te enfel vektu a ni bawk.
Syria nena oil deal turu tak siamtu Evropolis company te nen pawha inzawmna nei niin Wagner fighters te ralthuam ngaihtuahsaktu ber tia sawi niin US in a hrek zingah a tel bawk.
Thlawhnaah hian Yevgeny Makaryan, district police officer hlui March 2016 a Wagner zawmtu pawh a tel bawk a. Syria-ah Wagner tana raldo a tel tawh a ni.
Sergey Propustin pawh kum 2015 atanga Wagner a tel tawh niin ‘Kedr’ tia koh a ni a, Chechen war ah pawh tel tawh a ni bawk.
Alexan Totmin pawh telin “Tot” tia sawi niin ani bakah hian kum 2017 atanga Wagner a tel tawh Nikolay Matuseev pawh a tel bawk.

US President Biden an mak ti lo
US President Joe Biden chuan Yevgeny Prigpozhin, Wagner mercenrary group hotu lu ber Russia a thlawhna tlaa a thi chu ‘mak a tih loh’ thu a sawi.
“Eng nge thil thlen dan chiah ka hre lo va, mahse, mak ka ti lo” tiin Biden chuan a sawi a.
“Russia ramah Presient Vladimir Putin tel lohna thil thleng a awm mang lo” tiin reporter tena an zawhna a chhang a. “Putin a thuihruai thin chunga thil thleng hi a chhanna ka hre hauh lo” tiin a sawi bawk.
“Prigozhin chu ni ila, ka thil eiah ka fimkhur ang a, menu ka enchik ngawt ang” tiin Biden chuan a sawi bawk.
White House National Security thupuangtu Adrinenne Watson pawhin Prigozhin thih thutna chungchangah thil mak a ni lo tiin a sawi bawk.
Russia chuan Prigozhin chu a thi tih chiang takin a la sawi chhuak duh lo thung a. Chu mai bakah thlawhna tla chungchang chuan Russian news a luah lo hle bawk a. Russian President Vladimir Putin pawhin engmah sawi a la nei lo bawk.
Khawvelin Prigozhin thihna chu a ngaihven hle a, mahse, engmah sawi chianna a la awm lo thung a. Chutihrual chiah chuan Russia sawiselna leh Russia sorkar hmalakna nia ngaih theiha ngaihna a lian hle bawk.