Tho â nasa ber

Guinness World Record siam rau rauah thawh ât nasat avanga record siam chu a duhawm vak lo. Sap hoin ‘sleepwalk’ an ti a, keinin tho â kan ti ve mai a, mipa naupang pakhat chu a’n tho â nasa khawp mai, a thawh ât laiin km 160 a hlaah a lo awm daih hman a, Guinness World Record, tho â nasa ber record a siam!
Mahse, he record hi tunhnaia mi a ni tawh lo va, kum 36 kaltaa mi kha a ni daih tawh, vawiin thlengin he record hi khum thei an la awm lo. Record siamtu chu Michael Dixon a ni a, Peru, Indiana, US-a rel station a mut thawmhnawh chauh hain, kelawngin an hmu a, chutih lai chuan mipa naupang kum 11 mi chauh a la ni a, April ni 6, 1987 kha a ni. Rel a hnathawktu ten chutia naupang mutkawr chauh ha, kelawng lehnghala awm ta chu police an hriattir a, an han zawt chiang a, Dixon chu Danville, Illinois a cheng daih a lo ni si!
Dixon hi a zan mu tho â chu an in atanga chhuakin an in bul lawka rel station-ah kalin, muhil reng chungin rel-ah a lo chuang daih chu niin! A rel chuanna lah chu khualzin phur chi ni lovin, bungraw phur chi a lo ni si a, a chuang lai pawh tuman an lo hmu lo a ni. Dixon hi Miami County Welfare Department-a a case buaipuituin a kawmnaah rel-a a chuan lai leh a chhuk lai a hre miah lo niin a sawi a, ke phah tlemin a pilh deuh tih mai loh chuan hliam dang a nei lo.
Dixon hi police ten a awmna chhin a chhungte an hriattir vat a,a nuin a va hruai ta a ni. The Ball State Daily News-in a tarlan dan chuan Dixon-a nu chuan a fapa hi zan dar 10-ah a khuma a mu lai a hmu ngei tiha sawi a, a fapa hi a tho â thin chu a hria a, mahse, an in han chhuahsan tur khawpa tho â turah chuan a lo beisei ngai lo niin a sawi bawk.