Thuin Trump-a leh Zelensky an inbei mek

Thuin Trump-a leh Zelensky an inbei mek
President Donald Trump-a chuan Ukrainian President Volodymyr Zelensky chu ‘dictator’ tia sawiin hruaitu pahnihte inkar a khi mek.
A hmain Zelensky-a hian Saudi Arabia-a US-Russia inbiaknaa Kyiv telh ve a nih loh chungchangah US president hi Moscow-in ‘thu dik tawk loh a hrilhnaah a cheng’ tiin a lo sawi tawh.
Florida-a Saudi thlawp investment meeting-ah Nilaini khan Trump-a chuan thu sawiin Zelensky-a chu thil pakhat, ‘Joe Biden-a anga thil khal mai maiah’ chauh a tha tiin a sawi.
‘Dictator’ tih tawngkam chu European hruaitu hrang hrangten tha lo an tih sawiin German Chancellor Olaf Scholz chuan ‘a dik lo va, President Zelensky-a’n mipui rorelna a a tun din dan sawi nepsakna a ni’ tih a sawi.
UK Prime Minister Sir Keir Starmer pawhin Zelensky hi phone-a biain a tan tlat thu a hrilh.
Downing Street thupuangtu chuan ‘UK pawhin Indopui II-naa a tih theih loh ang bawkin Ukraine-ah pawh hian inthlan hi thulh loh theih loh a ni’ tiin Sir Starmer-a chuan a sawi tih a puang.
Zelensky-a kum nga awh term hi May, 2024-a zo tawh tur niin Russia-in February, 2022 atanga a rûn avangin Ukraine hi martial law hmangin inthlan sawn hlat a ni.
Swedish Prime Minister Ulf Kristersson-a pawhin Trump-a’n ‘dictator’ tih thumal a hmang chu sawiselin German Foreign Minister Annalena Baerbock pawhin ‘pawm theih loh’ a ti.
Florida-a thu a sawinaah hian Trump-a chuan Zelensky-a hi ‘dictator’ a ti a, a hma lawkin Truth Social post-ah Ukrainian president hi hetiang bawk hian a ti tawh bawk.
“Inthlan a duh lo va, Ukrainian inthlanah a hniam tawh a ni. An khawpui chhe vek karah engtin nge a san theih ang?” a ti.
Thawhlehni khan US leh Russian thuneitute chu Russia-in Ukraine a do hnua a vawi khat nan hmaichhanah an inbia.
Thua inbeihna hi Trump-a’n Thawhlehnia Mar-a-Lago, Florida-a thuthar lakhawmtute a kawmnaah indonaah Ukraine a dem thu a sawi atangin a intan.
Trump-a hian indona chhuak mekah hian President Vladimir Putin-a hming chu a lam ri ve miah lo bawk.
Nilaini khan Zelensky-a chuan Kyiv-a thuthar lakhawmtute a kawmnaah, “Russia atanga lo chhuak thu dik lo tam tak kan hria a. President Donald Trump-a pawh hi hetiangah hian a cheng a ni,” a ti.
Tlai lamah Ukrainian hruaitu chuan khawvel chu ‘Putin-a nen nge muanna’ tih inkarah a awm mek tih a sawi a, an rama Washington palai, Keith Kellogg nen Ninganiah an inhmu danw tih a sawi bawk.
Trump-a hian Zelensky-a hi an ramah 4% chauhvin president atan an pawm tawh tih a sawi a; mahse, BBC Verify chuan 57%-in president hi an la pawm niin a tar lang thung.
Hetih lai hian Russian President Putin-a chuan Trump-a a hmuh hnaih thu thuthar lakhawmtute hnenah a hrilh.