MNF party leh sawrkar hotute kara eptuten hem thlak an tumna chu thu tak a nih loh zia a lo langchhuak leh thin tih MNF MLA Prof F Lalnunmawia chuan a sawi.
-- Advertisement --
Thawhlehnia Aizawl South III North Block MNF-in Falkawna political training an neih a hmanpuinaah Aizawl South III bialtu MLA Prof F Lalnunmawia chuan opposition-ten an party leh sawrkar hotute karah hem thlak tumin an thiam chitinin bei mah se, chu’ngte chu a tak a nih loh zia a lang zel tih a sawi. “Tunah hian kan hotute leh sawrkar hi kawng dangin min bei leh a, kum hnih kalta maia Covid-19 hrileng leh thildang vanga sum harsatna kan tawh nasat ziate kha sawi tha duh siloin, sawrkar leh CM hi sum enkawl thiam lo leh hmasawnna hna thawk chaklo hrim hrim angtein an sawisel mek a ni,” a ti.
Kum 2020 leh 2021-a Covid-19 leng vanga kan manganziate, hrileng do na’na sawrkarin theihtawp a chhuah zia te, sawrkar laipui atanga Mizoramin sum a beisei zat hmuh a nih loh ziate chu tlang hriat a ni tih MLA hian sawiin, “Opposition-te hian kan hun tawn harsat zia leh manganthlak ziate kha an theihnghilh ta mai em ni,” a ti.
Tun sawrkarin hun harsa leh khirh tak paltlang chu sawrkar term dang nena khaikhin chi a nih loh thu te, Pathian hruainain sawrkar chuan theihtawp a chhuah thu leh hun harsa leh khirh tak kan paltlang thei chu lawmawm a tih thu te a sawi. “Kumin hian sawrkar sum dinhmun a ziaawm kan beisei a, Pathianin rem a tih chuan nasa taka hna thawh kan tum a ni,” a ti.