Tih loh tur ti teuh tawh…

Kar kal ta June ni 22 Thawhtannia ZPM chhung inkhawma Pu TBC Lalvenchhunga thusawi, social media lama sawi zui hlawh takah khan, “Sawrkarin a tih loh tur a ti teuh tawh..” tih a tel a.
Hei hi, ZPM sawrkar chauh lovah pawh, sawrkar kal tawh zawng zawngah pawh khan thil thlen thin dan niin a lang a. Mahse, sawrkar kal taah te kha chuan, hruaitute zingah ‘sawrkarin a tih loh tur a ti teuh tawh’ tia mipui hriat tura sawi chhuak ngam kha an awm lo niin a lang a, mipui laka hmingthatna tur lam hawi bak, party diklohna mipui hmaa sawi chhuak ngam kha an awm lo a tih theih ang. A nihna takah chuan, sawrkarin a tihtur a lo tih loh pawha thup mawina tur zawng hram hram thin an ni hlawm awm e.
“Kum hnih leh a chanve kan liam tawh, eng chin hi nge kan tihhlawhtlin? Kan tih loh tur hi kan ti teuh tawh. Kan sawi reng reng loh hi hmalakna hmasaah kan nei teuh tawh…Huaisen tura kan inzirtirnate, ‘sawrkar hnathawkten he ram an tih chhiatzia hi politician chauh an ni lo’ tia kan sawina zawng zawng kha, vawiinah chuan sawrkar hnathawk thuhnuaiah kan awm, kan ngam lo. Party worker ten ‘ka fanu ka fapa hi lo dah ve teh….chumi chu lo duhsak ve teh’ tia dik lo kan tih chuan official-in min ngam sarh tawh mai a ni..”
TBC-a thusawi atanga lang chiang ta chu, ZPM kaihhruai sawrkar hian, inthlan hmaa mipui hena an lo tiam tawh, an sawrkar huna tihtur an lo tiam zawng zawngte kha thawh zawh a la nih hma hauhvin, thil dang daih an khawih nasa ta hle, tih hi a ni. Hei hi a sawitu hian party hruaitute hriat tur chauhvin emaw, cabinet meeting-ah emaw, PAC meeting-ah emaw pawh sawi lovin, Mizoram mipui leh khawvel huapa Mizo tawng hrethiam tawh phawtte hriat theih turin a sawi a. Chumi awmzia chu, ‘chhung lam atang chuan siam rem a harsa tawh a, mipuiin thil awmzia hre ve se, pressure a chak zawk ang a, party leh a kaihhruai sawrkar pawhin a tih loh tur ti lovin, a tihtur zawk tha takin a ti thei zawk ang’ tih duhna rilru put vang a nih a rinawm. Chuti chung pawha insiamthatna a thleng lo a nih chuan, ‘kei chu ka peih ta lo e’ tih inpeih ran chungin he thu hi a sawitu hian a sawi a nih a rinawm ta ber a ni.
Hetiang hi a ni lo’m ni mipuiin kan duh kha? India ram state thenkhat, dinhmun tha lo tak atanga dinhmun tha zawka hlangkai theitu hruaitu ropuite chanchin pawh hahipin kan sawi a, kan awt ve a, kan duh ve thin a ni lo’m ni kha?