Tim Walz an nomination pawm fel

US Minnesota Governor Tim Waltz chuan party vice president nomination chu Democratic National Convention neihnaah pawmin thusawina a neih zuiah, “Zanin hian thil pakhat avangin kan pungkhawma chu chu he ram hi kan hmangaih a ni,” tiin Walz chuan a sawi a.
Walz chuan Nebraska-a a seilen dan leh Minnesota-a zirtirtu leh footabll coach a nih chungchang sawiin ‘he inbeihnaa hlimna min thlen avangin lawmthu ka sawi a ni’ a ti bawk a.
“State dang ten school atanga lehkhabu te an khap laiin keini chuan riltam kan khap thung” tia sawiin Republican counterpart J.D. Vance chu kap zuiin, “Ka high school class-ah zirlai 24 ka nei a, tumah Yale rap an awm lo,” a ti zui bawk.
Walz chuan fanu neih an harsat em em thu sawiin an fanu a pian hnuah pawh Hope tia a hming a sak thu a sawi bawk a. A fapa Gus chuan a pa thusawi laia lo auin ‘khi khi ka pa a ni’ a lo ti bawk a.
“Tun anga thusawi hi ka nei tam ngai lo va, mahse, pep talks erawh ka nei fo” tiin Walz chuan a sawi zui bawk.
Democrats te chu Chicago a United Center ah pungkhawmin thla kaltaa party presidential ticket Kamala Harris-in a chan hnua boruak chhem alh zel tumin hma an la a.
Americans tam zawkte chuan Harris-in a running mate atana a thlan hma chuan tu nge Walz tih reng an hre lo. Mahse, campaign an tan hnuah Walz chuan a background avang pahwin mi tam tak a hip a, Midwest states a Harris-in vote a mamawh ngawih ngawihna hmunah Walz hian nasa takin vote a hmuhsak tura ngaih a ni.
Walz hian a hmain Philadelphia, Pennsylvania ah te Kamala Harris in a running mate atana a thlan hnuah thusawina a lo nei tawh a.
“Minnesota-ah chuan kan thenawm te kan zah a mimal duhthlanna kan zahsak em em bawk,” tia sawiin, “An duhthlanna kan duh ve lem lo a nih pawhin kan zahsak a. Golden Rule kan nei a, chu chu nangmah inngaihtuah rawh tih a ni,” tiin a sawi.
Mimal zalenna chu kumin inthlan hmaa Democratic tena campaign auhla bera an neih a ni a. “Keini Democrats tena zalenna kan sawi hian keimahni tan leh kan hmangaihte tana an nun nawm nana zalenna a ni kan sawi ni” a ti a.
“Kan hriselna chungchanga thutlukna siam theihna zalenna, kan fatena hlauh nei lo leh school a kahhlum an nih hlauhna nei lova an kal theihna te a ni” tiin a sawi.
Hei bakah hian Democratic tena ngaih pawimawh an neih sawiin Minnesota governor a nih laiin free school launch, paid familyleh medical leave pek te, middle-class family-te tana tax tihhniam te, prescription drug price tihhniam te a sawilang bawk.
Bill Clinton an Donald Trump sawichhia
Walz thusawi zawhah President hlui Bill Clinton chuan thusawina neiin Donald trump chu na taka sawichhia in mahni hmasial a ti a, Kamala Harris chu fakin Americans te mamawh nia a ngaih a thlurbing bawk.
“Duhthlan tur chiang tak kan neihah ka ngai a. Mipuite tan Kamala Harris a ni. Pakhat zawka erawh hi chu (Trump sawina) amah chauh, keimah leh ka tih vek a ni” tiin Clinton chuan a sawi.
Clinton chu American president 42-na niin Democratic party veteran a ni bawk a. Barack Obama phei chuan Bill Clinton chu ‘secretary of explaining stuff’ tiin a sawi a ni.
Kum 78-a upa ni tawhin Trump nen an inrual chiah a, Clinton erawh tun hma ang lo takin a thusawi a bahlah nasa tawh a, Harris hming pawh tum hnih a lam sual a, a kut vei lam pawh a khur tih a hriat tawh bawk.
Tichung chuan Trump chu na taka beiin, “Ama chanchin bak a sawi ngai lo. Chuvangin a thusawi in ngaihthlak leh hunah pawh a dawt sawi aiah ‘keimah/ka’ a tih zat lo chhiar rawh u” tiin US president hlui chuan a sawi.