TKP Day vawi 72-na hmang

Mizoram Baptist Kohhran thalai, Thalai Kristian Pawl din champha vawi 72-na chu July 30 khan hman a ni a. Kumin thupui chu “Pathian nen lo inrem rawh u” (II Kor. 5:20) tih a ni.
TKP Day-ah hian kumtinin Unit tam zawk chuan zingkarah vantlang tana thil tha tihna’na hmangin vantlang hmunhma thenfai, biak in leh a chhehvel tihfai, chhunlamah awmni khama intihhlimna leh inelna thianghlim neiin, MTKP atanga programme duansa angin Unit tinah TKP Day lawman inkhawm neih thin a ni a. Kuminah erawh Pathianni-ah a tlak avangin, Unit thenkhat chuan Inrinni khan vantlang hmun tihfai, a thlawna thisen pek leh biak in leh a chhehvel tifiin an chechhuak a. Pathianni ah tualchhung kohhran leh TKP Unit ten a hman dan tur leh ruahmanna an siam angin an hmang.
Kumdanga tih thin angin MTKP hruaitute chuan Unit hrang hrangah an hmanpui a. MTKP president Upa R Lalrochama chuan Luangmual Unit Theiriat bialah a hmanpui a ni.
Kumin TKP Day pual hian member-te tawngtai thupui tur chi 6 thlansa a ni a. 2023 MLA inthlan awm tur atan, kan ramah rorelna dik a awm theihna’n, ruihhlo ngaite leh a zuartuten an sim theihna’n, TKP member-te an intodelh deuh deuh theihna’n, MTKP hmalakna hrang hrang tihhlawhtlin theih na’n, Manipur buai avanga harsatna tawk mekte tan, te a ni.