Tlabung kawng siam zawh thuai a nih theihnan ruahmanna siam

Tlabung kawng siam zawh thuai
a nih theihnan ruahmanna siam
National Highway 54A & 302 (Hrangchalkawn – Tlabung) kawngpui laih zauh hna leh siamthat hna thawh mek sawihoin Zirtawpni khan Competent Authority for Land Acquisition (CALA) Lunglei, addl DC Rochuangkimi Khenglawt hoin an thukhawm.
CALA chuan Hrangchalkawn- Tlabung kawng zauh leh siamah contractor chu kumin fur hmaa chak taka hna thawk tura beisei an nih laiin, furin a nanchin tak avang leh fur a nat avanga mipui leh thawktuten harsatna an tawh thu sawiin, fur chhungin leimin leh chirh tawlh thenfai leh kawng chhe thawmthat lamah tha leh tui tam tak an seng a, thawktute chu hriatthiamna thui tak nen thlir an ni tih a sawi.
Tunah khua a ro tan a, tuna thutkhawm hian rah tha a chhuah a, hna thawh hun tawite chhungin chak leh tha taka kawngpui zauh leh siamthat hna thawh zawh thuai a nih a beisei thu a sawi bawk.
Kawng siam hna thawktu NHIDCL leh contractor BRNIPL (BRN Infrastructure Private Limited) aiawhte hna thawh chin leh hmachhawp an sawi a. Kawng chhe zual lai an ngaihpawimawh hmasak tur thu leh leimin leh chirh thenfai bakah an kawng siamsa furin a tihchhiat thawmthat tan mek a ni tih an sawi.
Official-te leh pawl hrang hrang aiawhten hma an lak dan an sawi a. An ngaimawh leh ngaihpawimawh zawng sawiin, chak leh tha zawka hna thawh a nih theihnana rawtna an neihte sawiho a ni.
Zangnadawmna pek kawnga harsatna la awm chu chak taka bawhzui mek a ni, tiin, kawng hlui kalnaa sawrkar ram chin, tuna kawng tharin a kalsante a duh duhin an ta chei mai lohnan humhalh turin district thuneituten chhinchhiahin perh an tar mek tih sawi a ni.
Kawng siam dan leh lung hman chungchangah lung chang tha hman pawimawhna leh tui luankawr siam ran a pawimawh tih sawi niin, leivung paih fimkhur a tul dan, ram leilung, lui leh nungchaten an tuar loh nana leivung paihna hmun ruahmansaah chauh paih a nih theihnan kawng laitu leh leivung paihtute inzirtir zel a pawimawh tih pawh sawi a ni bawk.

Hrangchalkawn – Tlabung kawngpui (NH-54A & 302) ah kawng tha a awm a, chak tak leh ram leilung leh chhehvel tana him tura hna thawh a nih theih nan hetiang hian thukhawm chuan ruahmanna an siam:
* Contractor BRNIPL-in hna thawktu an neih mek leh khawl an hman mek zat leh dinhmun kimchang DC-ah thehlut se.
* Contractor-ten an hna thawh dan tur ruahmanna fel tak hunbi thenfel sa leh hna thawktu leh khawl an mamawh zat leh an mamawh belh dan tur ruahmanin DC-ah theh lut se. Chumi hmang chuan hna an thawh dan uluk taka vil nise.
* Kawng siamnaah lung chang tha hman a nih theihnan khawtual mi leh pawlten lung lakna quarry tha kawhhmuh leh bengvarpui nise.
* Tlabungah BRNIPL-in site office an din theihnan hma lak nise.