Tlabung oil palm hralh tan
Lunglei district Tlabung leh a chhehvela oil palm chin chu hralhchhuah tan mek a ni.
Lunglei District Agriculture Office buatsaihin Tlabungah oil palm chingtu mi 9 thar, kg. 4175 chu Inrinni khan thawnchhuah a ni a. Hei hi kumin atana Tlabung chhehvela oil palm thar hralh chhuah hmasa ber a ni.
Oil palm hralh tur vailiamnaah hian Tlabunga oil palm chingtute, Agriculture & Farmers Welfare department thawktute leh partner company – Patanjali Foods Ltd aiawh an tel a. Tlabung Block huamchhunga oil palm chin leh hralh chungchanga hma lak zel dan tur leh hmasawnna tur ruahmanna an sawiho nghal.
Tlabung Block huamchhungah hian oil palm chingtu chhungkaw 80 vel awmin, ram hectare 150 vela zauah oil palm an ching a. Tlabung, Tipperaghat leh Khojoysuri khuaah an ching mek. Agriculture department chuan kuthnathawktute hnenah oil palm tiak an sem thin a. A chinna senso hrang hrang – a hmun enkawlna, half moon terrace laihna, leilawn leh a sengna – harvesting pole chu oil palm farmer-te hnenah pek thin a ni.
Mizoram chhim lama oil palm hralhna chungchangah Agriculture department leh Patanjali Foods Ltd hi thawk dunin, company hian oil palm rah, ‘Fresh Fruit Bunch (FFB)’ an lei thin a. Tun dinhmunah Bukvanneia Godrej Company Oil Palm Mill-ah an la hralh chhawng rih. Lawngtlai district-a Liapha khuaah Patanjali Company hian Oil Palm Mill buatsaih mekin, kumin hian hawn theih beisei a ni.
Lunglei DAO Lungsen Block Agricultural Technology Management Agency (ATMA) leh Patanjali Company buatsaihin April 10 khan Tlabungah RKVY hnuaia lei hriselna chungchang zirho a ni bawk a. Oil palm ching mek leh ching thar turte tan training buatsaih a ni.
Lunglei DAO Dr Samuel Lalliansanga hoin Agriculture & Farmer’s Welfare department hnuaia thawktute leh Patanjali Company aiawhten hun an hmanpui a. Endik tura soil sample lak dan, lei hrisel dan leh lei that dan (soil health card & soil health & fertility) chungchanga hriat tur pawimawh an zirtir a. Patanjali Company Mlamin oil palm chin dan a zirtir bawk.
Lunglei DAO hian Tlabung Block chhunga buh hmun leilet (wet rice cultivation) pawimawh a tlawh nghal a. Mizoram hmun danga chin ve loh thlasik buh (rabi rice) chinna hmun tlawhin, hmalak zel dan tur an enho. Tlabungah vek hian Jute Corporation of India leh Tlabung MPACS nen thawk hoin jute ching tura hma lak dan leh ruahmanna kalpui theih dan sawiho a ni.