Tlawng lei dawh tum tlawlh Dawh zawh hun tur hriat loh

Tlawng lei dawh tum tlawlh
Dawh zawh hun tur hriat loh
Aizawl leh Lengpui inkara Tlawng Lei dawh tum mek chu thawh zawh tep a nih tawh laiin, dawh kai theih lohin a awm leh a, zawh hun tur sawi mai theih a ni lo.
Thudawn danin, Sihhmui kaia Tlawng lei dawh hna thawktu Poddar Infratech Pvt. Ltd chuan Thawhtanni khan lei tur duan tawh sa hi ral lehlama a nih dan tur anga nghah tumin chawhma dar 10 vel atangin an che tan a; Sihhmui lam atanga tawlh tirin, fimkhur leh uluk taka lei remkhawm sa dawh phei an tum lai mekin, tlai dar 4.00 pelh hnu lawkah lei khaitu thir hrui (cable) chatin lei tawlhtirtu tur pawh a tichhe leh a, hna hi chhunzawm theih a ni ta lo. Dawh zawh hun tur pawh tun maiah chuan sawilawk theih a ni lo bawk.
Mizoram PWD chuan thuchhuah siamin, Lengpui Airport road Sihhmui kaia Tlawng lei dawh mek chu dawh kai tura load test a nih laiin a lei khaikangtu cable a chat a. Hei vang hian dawhkai hna hi chhunzawm mai theih a ni dawn lo, tiin, lei hi highway kawngah hnuh phei tawh a nih avangin, a helna kawngah hian hun engemawti chhung chu LMV chin hnuailam lirthei kal a ngai dawn tih a sawi.
Lirthei tlanvel a buai lohnan MMV chin chunglam chu Buichali lama kal tura ngen an ni a; December 11 atanga thu leh awm hma chu a helna hi hman rih a ngai dawn tih sawi a ni.
‘Load test-ah harsatna a awm tak avangin contractor-te leh an design engineer-ten dawhkai dan tur changtlung zawk ruahmanin hma an la dawn a. Thutlukna siam a nih veleh lei dawhkai hna hi chhunzawm leh thuai a ni dawn,’ PWD thuchhuah chuan a ti.