Tlawng lui a nu leh tawh

Tlawng lui nut thu hi ‘news’ a tling lo lek lek tawh; a nu a nu a, tui an pump loh phah fo. Tun hnai teah pawh chutiang chu a thleng ngun a, tunah pawh pump tlak loh khawpin a nu leh tawh!
Aizawl mipuite tui tlan Tlawng lui hi a nu ngun ta khawp mai a, tun hnaiah a nut avanga an pump loh hnuah an pump leh a, an ti dawn chauh a, pump tlak a ni lo leh tawh.
PHE dept atanga thu dawn danin, Chawlhni (June ni 8) khan lui tui hi a nu leh a, NTU 900 chuang te a ni.
Tlawng tui hi PHE department hian Greater Aizawl Water Supply Scheme hnuaiah an pump a, phase I leh phase II a awm. Phase I hi an chawl a, Phase II erawh an chawl pumhlum lo.
Phase II-ah hian Tlawng tui bakah Serlui tui an la a, Serlui tui hi lak tlak a lo nih avangin an pump; Tlawng tui bik chu an chawl tho. Serlui pawh hi nu lo a ni lo a, Tlawng aiin a lo zia a, tui mamawhna a sang si a, chuvanga pump chu an ni.
Phase II hnuaia Serlui tui lak hna hi 2015-a an tan (commission) a ni a, hei hi Aizawl ipui tui mamawhna phuhrutu pawimawh a tling.
May ni 31 atanga June ni 3 thleng khan Tlawng a nut avangin tui an la (pump) lo tawh a, ni 4 atanga ni 6 thleng khan a zia tak deuh avangin an pump leh, mahse ni 8-ah pump chi loh khawpin a nu leh.
PHE department hotute chuan tui hi ni khat emaw lek pump loh pawhin a nghawng a thui hman a, pump loh chhunga tui mamawhna a lo san hman avangin ngaiawh leh tur chuan pump hnem a ngai hle zel tih an sawi a, May ni 31 atanga June ni 3 thlenga pump loh vanga tui harsatna kha ni 4 atanga ni 6 thlenga an pump khan a hnawh khat hman lo a, tunah an pump thei lo leh a nih chuan ngaiawh tur chuan nghah deuh a ngai ang tih an sawi.
June ni 8-ah Aizawl velah ruah tam tham a sur lo chungin tui a nu a, PHE department lam chuan ruah a sur hnem vanga a nut hian a langsar a, ruah a sur lo chung pawhin a nu thin tih an sawi.
Tun hnaiah tui a nut avangin tum li an pump lo tawh; April-ah vawi khat, May thla tirah vawi khat, May 31 atanga June ni 3 thlengin, June ni 8 leh ni 9-ah an pump thei lo leh.