Tlawng lui km. 87-a thui
National Waterway-ah puang
Assam lam chin atanga Khamrang thleng, km.87 chuang hreta thui chu sawrkar laipuiin National Waterway No.102 ah a puang.
Parliament Session neih mekah Union Minister of Ports, Shipping & Waterways Sarbananda Sonowal chuan Mizoram Rajya Sabha MP K Vanlalvena zawhna a chhan danin, Assam rama Gharmura lei (bridge) NH 154 atanga intanin, Khamrang rama NH 54 bul thleng km. 87.136 a thui Tlawng lui chu National Waterway No.102 atana puan a ni tawh a. Khamrang leh Sairang inkar Tlawng lui erawh tui a thuk tawk loh avangin National Waterway No.102 hian a huam pha lo.
Mizoram MP zawhna dang chhangin Union minister chuan, Tlabung atanga Tuichawng inkar Khawthlangtuipui tihhmasawnna’n leh lui mawng tihfaina atan cheng vaibelchhe 6.17 pawm a ni tawh a, first instalment cheng vaibelchhe 1.23 pek chhuah a ni tawh.
Bay of Bengal tuifinriat kama Sittwa lawng chawlhhmun atanga Myanmar leh Mizoram inrina thlengin Chhimtuipui lui chu lawng zawh theiha siam tumna a awm em, tih pawh K Vanlalvena hian a zawt a. Union minister hian, Kolkatta atanga km. 539 a thui Sittwa lawng chawlhhmun chu hmarchhak state-te tana hman tangkai a nih theihna’n Mizoram atanga km.121 a thui, Paletwa thlengin KMMTTP Road laih mek a ni a. Paletwa atanga Chhimtuipui lui mawng lam hi Sittwa thlengin km. 158 a thui niin, hei hi lawnga zawh theih a ni tih a sawi. Hei hian NE state atangin India ram hmun dang panna tur kawngpui a siam belh dawn tih a sawi bawk.
Tlawng lui km. 87-a thui National Waterway-ah puang
Get real time updates directly on you device, subscribe now.
Prev Post
Next Post