Tlawng lui nu tih reh dan ngaihtuah

A kaihhnawih sawrkar aiawh leh tlawmngai pawl chuan Tlawng lui tui nu thin tih reh dan tur ngaihtuah a, ruahmanna hrang hrang duan a ni. Public Health Engineering minister Prof Lalnilawma hoin PHE department hotute, Disaster Management & Rehabilitation department hotute, Aizawl Municipal Corporation aiawh leh tlawmngai pawl pathum – Central YMA, Centre for Environment & Social Justice leh Save The Riparians hruaituten tunhnaia Tlawng lui nu vak chungchang sawihoin Thawhlehni khan an thukhawm.
Aizawl khawpui mai ni lo, Mizoram khaw tam tak tan Tlawng lui chu innghahna a nih avangin Tlawng dunga lui leh tui hnar humhalh chu department mal niloin High Level Committee-ah sawiho nise tia rawt a ni.
PHE minister chuan Tlawng lui chu Aizawl khawpui tui tlan ber a nih avangin vei tlan a tul a, a humhalh kawngah sawrkar department hrang hrang leh tlawmngai pawlte tan tanhoa mipui zirtir chu thil tul a ni tih a sawi. Tunhnaiah tui awm reng si, tui a nut zual avanga pump theih loh a awm zeuh zeuh, tiin, hengte hi a chhan hriat a, hma lak ngai chu sawiho tha tia thutkhawm koh a ni tih a sawi a ni.
PHE department report danin, April leh May vawiin thlengin, ni 4 ve ve chhungin tui a nut avangin tui an pump tam thei loa, tui nu (turbidity) tehna, ‘NTU’ tia sawi a, 5NTU aia sanglo tur chu tui in tlaka ngaih a ni a, tui a nut laiin turbidity hi 900 – 1400 inkar a ni thin. Hei vang hian tui tih thianghlim chu hna hautak leh khawlin a tawrh theih avangin tui pump theih zat nasa takin heng hunlai hian a tlahniam thin tih sawi a ni.
Central YMA, CESJ leh Save The Riparians chuan Tlawng lui nut chhan nia an hriat leh hmalak dan tur an sawi a. AMC pawhin leivung paih chungchanga ruahmanna an siamte sawi a ni. Aizawl tui tlan ber a nih angin Tlawng lui humhalh chu mutmawh hnarmawha neih a tul thu sawiin, rawtna hrang hrang siam a ni.
Thutkhawma thu rel:
8 Tlawng lui nut chhanah hian department mal anga hma lak mai theih a ni lo a, department hrang hrang tanho a ngai a, zau zawka sawiho leh hma lak a nih theihnan chief minister kaihhruaiin High Level Committee din nise, an ti.
8 Leivung/ bawlhhlawh paih chungchanga tun aia tha zawk inkaihruai leh dan mumal zawk siam a, dan loa leivung paih thin chunga hremna khauh lekkawh a tul tih sawi a ni.
8 Tlawng lui dung enkawl leh tui hna humhalhna atan hemi atan a hranpaa master plan duan tul an ti a. The Mizoram (Protection of Rivers) Act 2023 a taka hman a tul zia sawi a ni.