Tlawng thleng lovin Tlawng fintu then fai tum ta zawk
Aizawl khawpui tui tlan Tlawng lui then fai tuma ni tina hnatlang mekte’n an tum an thlak a, Tlawng lui fintu lui leh kawr lian tihfai phawt an tum ta zawk.
“Save the Riparian” tia hming vuahin mi thahnemngaite’n Tlawng lui then fai an tum a, Aizawl chhim lam lui kawr, Tlawng fintu atanga tanin March ni 26 khan an hnatlang; ni 20 chhunga Tlawng thlen an tum a, mahse an lui kawr beih mek hi an rin phak bakin a lo tawp, thui an kal thei lo. Chu lui kawr chu tihfai law law phawta Tlawnga luang lut lui leh kawr dang pawh hma law law phawt an tum ta.
“Kan tui tlan Tlawnga luang lutte hi ngai pawimawh law law ang u kan ti ta mai. Tlawng kha fai vuk se, a fintute a tawp tho chuan awmzia a awm dawn lo a,” tiin he hnatlanga frontline leader Roma Hmar chuan a ti.
An tum dan chuan, Aizawl chhim lam lui kawr an hma chhunzawm ang a, chumi zawhah lui leh kawr Tlawng fintu dang an thian leh ang.
“Tuikual lui te, Bawngkawn lam atanga Chite-a luang lut lui kawr te kan ngai pawimawh ang,” Roma chuan a ti.
Ni 20 chhunga Tlawng thlen hman tuma hnatlangte khan tunah pawh Aizawl an la pel thei lo a, hma an sawn thei lo. An rin phak bakin lui kawr a lo tawp a, then fai a hautak a, bawlhhlawh tlem azawng thian tur pawhin beih fe a ngai thin.
An hnatlannaah motor a luh theih loh avangin an bawlhhlawh lakkhawmte hi kawngpuia dah leh a ngai thin a, bawlhhlawh then a hautak bakah a thiar pawh hna a tling. Tunah hian trip 100 dawn chu an lakhawm tawh tih an sawi.
Frontline member hi paruk an ni a, a bul hnai thalai thenkhat leh zirlaite’n an pui thin. Thawhlehni pawh khan mi 20 vel an hnatlang.
Kawng dangin mi hrang hrangin an pui a, Victor da Scavenger-in hnatlangte hak tur t-shirt a tum a, damdawi in hrang hrangin kutkawr an pe thin bawk. G-pay hmanga pawisa thawh pawh an awm thin.
An sawi danin, bawlhhlawhah hian diaper chhia a tam a, rizai chhia leh blanket chhia, puan hlai tak tak, silpaulin, carpet chhia leh hmeichhe thla tin bi a chhuah changa an hman, hman hnu a tam bawk.
Aizawl atanga Tlawng fintu then fai phawta Tlawn lui luh chilh an tum a, Tlawng pawh hi beih fe tham a ni ang an ti.