Tlawng ti nutu nia an ngaihmi pahnih lakah FIR thehlut

Centre for Environment & Social Justice (CEJS) chuan Tlawng lui ti nutu nia an puh mi pahnih lakah Zonuam Police Station-ah FIR an thehlut.

CEJS-in first information report an thehluha an ziah danin, Lalremchanga Luangmual chuan Ainawn Vengah leivung paihna hmun a nei a, engtik hun atangin nge man chawia leivung a paih tir an hre lo. Kum 2024 atangin an zirchiang tan a, an leivung paihnaah hian Aizawl khawpui hmuntin atangin pik-up, 407 truck leh a aia lian (ke paruk nei) truck hoin nitin tum 200 - 300 leivung an paih. Heng leivung hi Tuithum luiah a lut a, Tuithum lui hian Aizawl tui tlan Tlawng a fin a, ruahsurin Tlawng lui a ti nu thin a ni.
Blue Mountain Corporation-in Ainawn Vengah mi lei leh turin Federation Enclave an sa a, an in sakna vung hi Tuikual luiah an nawr liam a, mi tam takin harsatna an tawh phah bakah Tuikual lui hian Tlawng a fin vangin Tlawng tui tlantu Aizawl mipui nuai tel pawi an sawi, tiin an thlen a ni.
‘Fur ruahsur tam vanga Tlawng lui pump tlak loa nut chhan tam tak zingah Lalremchanga leh Blue Mountain Corporation ten dan loa leivung an paih hi kum 2024- 2025 ah chuan a chhan lian ber niin kan hria a. Hetianga an mimal hlawkna tura mipui nuai thum chuang harsatna an thlen hi uluk taka chhui a, an phu tawk hremna an hmuh ngei theihnan hma la turin ka ngen che a ni,’ tiin an ziak a ni.
CESJ chuan, leivung paih duhdah avang hian ruahsur tam apiangin Tlawng lui nu vangin Aizawl khawpuia cheng mi nuai 3-4 chuan tui kan harsa thin tih an sawi a. Chumi tluka pawi chu, leivung lut vang hian Tlawng lui a pawnlang a, thalah tui a tlem a, furah tui a lian hma em em a. Luiah chirhdum hlir a nih vangin luia nungchate tan lui lung pat-ek ei tur a awm tawh loa, an chereu nasa tawh hle tih an sawi.
‘Tuna kan insiamthat loh chuan kan tu leh fa, kan tuchhuan lo awm turten Tlawng lui tui tlan tur an nei tawh dawn lo a ni,’ CESJ chuan a ti.