Tlawng tui a tlem telh telh

2024-ah khan Tlawngah tui MLD 200 chuang a awm thin a, 2025-ah chuan a tam ber lai pawhin MLD 132 vel chauh a ni.
Mizoram lui pawimawh, Aizawl tui tlan Tlawng tui a tlem telh telh a, Budget Session neih mekah tui tlem telh telh thu hi an sawi.
Hachhek bialtu Robert Romawia Royte zawhna, ziaka chhan chi “Kum tin thal laia Tlawng lui tui tlem zual zel nia sawi hi a dik em?” tih chu PHE minister Prof Lalnilawma’n “Aw, dik e, ruah sur hma dan azirin Tlawng tui hi a hma kum aia a tam tum erawh a awm,” tiin a chhang.
Minister hian tun hnai kum nga chhunga tui tam lam, department-in an chhinchhiah dan a sawi a, chutah chuan Tlawng tui a tlem telh telh tih hi a lang a ni.
Minister chhannaa a lan danin, 2021-ah khan an chhinchhiah chinah tui a tam ber ni chu December ni 20 a ni a, MLD 536.405 a awm. Hemi kum December ni 27-ah pawh MLD 396.651 a awm a, 2025-a a tam ber ni, January ni 6-ah chuan MLD 132.684 a awm. A inthlau hle.
2022-ah tui tam ber ni chu May ni 6 a ni a, MLD 378.615 a awm. May ni 16-ah pawh MLD 364.287 a awm a, January ni 3-ah pawh MLD 329.678 a awm. Hemi kuma a tlem ber tumin, May ni 3-ah MLD 80.731 a awm.
2023-ah a tam ber ni chu June ni 8 a ni a, MLD 502.311 a awm a, December ni 19-ah MLD 390.421. June ni 7-ah MLD 383.106 a awm. A tlem ber ni May ni 2-ah MLD 37.947 a awm.
2024-ah a tam ber tumin January ni 4-ah MLD 229.355 a awm a, a tlem ber tumin May ni 2-ah MLD 37.947 a awm.
2025-ah a tam ber niin January ni 6-ah MLD 132.684 a awm a, a tlem ber ni chu April ni 7 niin, MLD 34.869 a awm. An chhinchhiahna enin, kum liam ta 2025-ah khan MLD 50 hnuai a ni fo a, a tam ber nia tui awm zat pawh hi a tlem.
Tui tam ni leh tlem ni
2021 December ni 20-ah MLD 536.405
2022 May ni 6-ah MLD 378.615
2023 June ni 8-ah MLD 502.311
2024 January ni 4-ah MLD 229.355
2025 January ni 6-ah MLD 132.684