Tlawng tui pump theih loha ti nu thintute hrem kan phut. – CESJ

Tunhnaia Tlawng lui nut chhanah Luangmuala Federation Enclave sakna leivung nawr liam chu a chhan pakhat a ni tih Centre for Environment Social Justice (CESJ) chuan an sawi a. Thuneituten an hrem ngei an phut tih an sawi.
CESJ thuchhuak chuan, May 28 khan Blue Mountain Corporation-in Luangmual-a Federation Enclave leh a bul chiaha Tlawng lui fintu tuihawk luankawr leh luite (perennial river) a luta dan loa leivung paihte complaint an dawn bawhzuiin a hmunah an endik a. He building sakna leivung paih hi excavator hmangin a thlang lam kawra lut tura hnawl liam zel a ni a, a danna lungbang (gabion wall) siam a ni lo a, chu chu ruah surin lenthla in a thlanga luikawr, thing, kalkawng, dilte a hnawhphui a, mihring pawh kaltlang theih a ni lo tih a sawi.
Dan loa leivung paih hian, a thlang lama huan neitute thlai a tichhe nasa hle a, an thlai chin cheng nuai tel man leivung paihtute hian an compensate loh chuan an tuar thlawn nasa hle dawn tih pawh sawiin, ‘Heng leivung paih hian Aizawl khawpui tui tlan Tlawng lui fintu luite tam tak a tichhia a ni,’ a ti.
Hetiang thil thlen hma pawh hian loneituten leivung paihtute hnenah vawi tam paih tawh lo turin an hrilh tawh a, ngaihsak an hlawh ngai lo tih CESJ hian sawiin, ‘Kawngpui leh luikawr a hnawh hnuah pawh leivung paihtuten an ngaihsak zui loa, tun thlengin leivung danna siam hmuh tur a la awm lo. Mahni hlawkna chauh ngaihtuaha mihring leh thil siam dang tuarna pawisa lotute vangin Tlawng lui pump theih lohin a nu ta bawk,’ a ti.
Leivung hi a dang tla leh thei a la awm teuh a, a bul chiaha leivung paihnaah pawh May 28 zan thleng khan leivung paih a la ni tih a sawi.
‘Hetianga dan bawhchhiatna a thleng reng chung a, thuneitu leh mawhphurtu, Aizawl Municipal Corporation-in a ngaipawimawh lo hi mak kan ti a. A rang thei ang bera hma an lak loh chuan, Aizawl khawpui mi nuai thum chuang thlavang hauhin thuneitu sang zawkah kan thlen ang,’ CESJ chuan a ti.