Tlawnga lut tur leivung paihtute paih tawh lo turin bond sign tir

Aizawl chawmtu luia leivung paihna remchang siamtu mi pahnih police hnena thlente chu koh an ni a, paih tawh lo tura an hming ziahhnana intiamtir an ni.
Centre for Environment & Social Justice (CESJ) chuan, Aizawla cheng mi nuai thum -li tui tlan tibawlhhlawh a, tlawng luia lut tura leivung, ek leh bawlhhlawh dang paih chu sual thiltih (crime) a nih avangin, kumin July 23 khan Zonuam Police Station Aizawlah FIR an thehlut a. Police hotute chuan tlawng luia lut tura leivung paiha an puh mi pahnih chu Police Station-ah koin leivung paih tawh lo tura intiamkamna, PR bond an sign tir tih a sawi.
‘An thiltih pawi zia an hriat phah ngei kan beisei a, police-te chungah lawmthu kan sawi a ni,’ a ti.
Aizawl leh a chhehvel mi nuai 3-4 chenna chawmtu tlawng lui humhim tumin kum thum zet theihtawp chhuahin an bei tawh a. thuneitute inthlahdahna avangin an la hlawhchham tluang zel tih CESJ hian sawiin, ‘Lui tibawlhhlawhtu leivung, in sak leh thiahna tawih thei lo, dawrkai hnawm (darthlalang keh them, plastic ip leh tuium ruak, tlawng fintu lui hrang hranga mimal in atanga ek paihna pipe khawh luh tir, septic tank sah thin zawng zawngte titawp turin mawhphurtu department hrang hrangah kan thlen tawh thin a. Aizawl District Court-ah pawh criminal complaint kan thehlut tawh a. Hmasawnna kan nei lo,’ a ti.
Leivung leh bawlhhlawh dang paih duhdah avanga tlawng tui pump tlak loa a nut fo vangin, kumin May 28 khan mimal leh sawrkar department hrang hrang chu dan loa leivung paih tawh lo tura ngenna thuchhuah an siam a. Mahni tui tlan ngei pawh tibawlhhawlh duhte huat leh sawisel an hlawh belhna mai ni mah se, kan nunna hnar luite leh luipui humhim turin CESJ team chu engmahin a tihnual ngai lo tih a sawi a ni.