TNT-in Tuichang ral kai zo tak ang maw?

TNT-in Tuichang ral kai zo tak ang maw?
Tata SK 712 Pro Vo-lleyball League hmawr-bawk a hnai zel a, zanin hian R. Dengthuama In-door Stadium, Mualpuiah Thutak Nunpuitu Team leh Tuichangralin mipa semi-final match hmasa zawk an khel dawn a; Tuichang-ral head coach David Ai-zampuia Fanai chuan Thu-tak Nunpuitu Team laka an tlawmna chhanglet tur-in hun tha an nei niin a ngai.
A vawihnihna’n final luh tumin Tuichangralin theihtawp an chhuah dawn a tih Aizampuia hian sawi-in, league-a an inkhelh tawhah TNT ngam lo viau mah se thil pahnihah hma an sawn phawt chuan an chak theih a beisei.
June ni 12 khan vawi nga an deuce hnuah Tuichangralin 30-28-in set hmasa ber an la na a, tunlaia team khawng leh inpumkhat tha ber TNT-in nawrletin set thum an la zawn zui a ni.
David Fanai chuan, “Kan inkhel kha ngun takin ka ennawn a, net bulah kan vuak dang turin ban an phar taimain a phui bik hle a, vuak leh ball per an la thei zawk hle bawk.
“Ball vuak hrim hrimah an tha bik lo, mahse, block leh defence-ah kan tluk lo a, insiamthata hmasawn ngei turin theihtawp kan chhuah dawn a ni,” a ti.
Aizawl pawn atanga Pro Volleyball-a tel hmasa ber Tuichangral hian season khat an hmanna 2018-ah final an lut a, kuminah final lut leh thei turin semi-final thleng mah se an hmaah fiahna hautak TNT an awm a, a vawihnihna’n final luh ngei tumin an inbuatsaih.
An khelh hnuhnun berah 3-2-in Tuipuiral an hneh hram a, league-ah palina ni chungin knockout round an lut. Mizo hlanga champion hmasa ber nih tumin TNT-in an bitum an hneh fai vek ve thung.
Tuipuiral nen an inkhelh laiin Tuichangral rinrawl Saidingpuia Sailo chuan a ke a tina a, Hunthar nen an inkhelh tumin hliam vangin hun pawimawhah lakchhuah a ni tawh bawk.
David Fanai chuan, “Tha tawm vangin harsatna a tawk thin a, ruh khawiha hliam na tak a ni lo. A khelh theih ngei kan ring,” a ti a, vawi nga an khelh tawhah Saitea’n point 84 thawkchhuakin 50 a hloh.
Tuipuiral nen an inkhelh lai thoin setter Hmangaihthanga a thlak a, Lalrinchhana hmangin set hnuhnung pahnih la zawn mah se an khelh dan pangngaiin Hmangaiha tho an hmang zui leh ang.
Tuichangral tan Haryana atanga an lakluh Vinod Khatkar chuan point 124 hlawh tawh mah se vawi hnih chiah an la chak a, 57 a hloh. Ball vuakah an chhe lo a, Saitea bakah danglamna siam tura rin ngam Lalhmunmawia’n point 20 hloh tawhin 60 a hmu tling ve thung.
Pro Volleyball hmasa ber 2016 khan league-ah TNT an sang ber a, rin hlawh tak ni chungin final-ah an chak zo lo. Nikumah knockout round lut team pali zingah an hniam ber a, semi-final-ah league-a chak vek Hunthar lehthalin a vawihnihna’n final an lut.
Kum 2022-a Hun-thar dinhmun ang kha tawng mekin, rin hlawh ni chunga an khelh dawn avangin boruak rit takin a delh tel a; chutih laiin TNT hian nikuma an player-te vek hmang chungin kum-inah hma an sawnzia an lantir mek.
Superstar Vanlal-tanchhana’n point 118 vaw chhuakin 34 a paih a; Tuichangral an hneh tum khan vawi 31 vaw tlain vawi nga chiah a tisual! A pumpuiah player tha ber ang hiala ngaih mek a ni a, D3 Business Player of the Match-ah tum li thlan a ni tawh.
Tuipuiral an hneh tumin TNT tichaktu pawimawh Zosangzuala leh Laldinchhunga an awl a, vawi li ve ve an khelhah point 40 chuang ve ve an thawkchhuak a; team inkhairual tak an nih avangin sut an harsa a, Sadraka Fanai chuan point 42 a thawkchhuak tawh bawk.
Net bula lehlam vuak dan kawngah TNT an tha a, Zosangzuala leh Sadraka’n an thawhhlawk. Chutih laia an team tinunga tichaktu pawimawh tak chu setter Lalliankima a ni a, Tlangsam player hian a nupui raipuar teuh tawh a kalsan.
An khelh hmasak berah Durtlang North hneha hlim taka hun an hman laiin a nupuiin fa a hrinsak a, hmu ve thei rih loin TNT tan hmabak pawimawh ber hlen tumin a insawrbing zui zel a ni.