Tomir thlaah mak tih tham khawpin to haw

May thla hi Mizote hun bi chhiar danah |omir thla a ni a, to haw hun, thlipui thawh hun leh ruah sur hun a ni. Kuminah pawh |omir thlaah thli a tleh a, ruah a tam a ni mai lo, mak tih tham khawpin a tam!
India ramah chuan cyclone tleh hun hi pahnihin an then a, pre-monsoon (March-June) leh post-monsoon (October leh November) te a ni. Kumin May-ah Remal cyclone a tleh. Mizoram pawhin a siper a dawng a, a ruah ken erawh a tam tluk tluk hle.
State Meteorological Centre-in an chhinchhiah danin, kumin May thlaah khan Mizoramah ruah mm 519 teh meuh mai a sur a, a hmain May thlaah hetiang zat a la sur ngai lo.
May thla hi ruah sur hun ni mah se a tam thla a ni lo a, June, July leh August te hi ruah tam thla a ni. Kumin May thlaa ruah tla zat (mm 519) hi June vela sur pawh ni se mak tih tham khawpa tam a tling tho.
State Meteorological Centre chhinchhiahna enin, May thlaah hian mm 500 hi a hmain vawi khat a lo tling tawh a, 1993 May-ah khan mm 504.6 a sur. Kumin May thlain a khum dawrh! 1988 May-ah khan mm 495.5 a tling bawk.
Kumin May-ah rau rau pawh ni 27 leh ni 28-ah khan a tam a, hei hi nakin zelah pawh sawi fo tur khawp a nih a rinawm. State Meteorological Centre lamin 2013-2023 chhunga May ni 27 leh ni 28 tea ruah sur zat an chhut a, kum 10 chhung hian May ni 27 leh ni 28-ahte chawhrualin ruah mm 12.85 a sur ziah angin an chhut. Kumin May ni 27 leh ni 28 tea ruah sur kha mm 285 daih a ni a, 2013-23 chhunga kum tin May ni 27 leh 28 tea ruah tui tla zat chawhrual aiin 2117.9% lawihin a tam. Chuvangin, kumin May thlaa ruah tui tla zat hi an la sawi zui fo ang a, ni 27 leh ni 28 tea ruah sur nasatzia hi khawlaiah pawh an la sawi zui fo ang.
State Meteorological Centre chhinchhiahna enin, 2003 June-ah khan ruah hi mm 590 a tla a, 2019 July-ah mm 539, 2010 August-ah mm 517.9, 2012 June-ah mm 505.5 a tla.
Ruah sur tam thla hun dang leh kumin May thlaa ruah tam kha a inan lohna chu, kuminah chuan ni 27 leh ni 28-ah cyclone ruah ken kha chhum lo chat lovin tam takin a sur tluk tluk kha a ni. Cyclone pakhat ruah ken khatianga tam kha a la sur ngai lo ang tih hial a ni.

Tun hnaia |omir thlaa ruah tla zat
Kum Ruah (MM)
2023 – 102.8
2022 – 327.8
2021 – 164.2
2020 – 290
2019 – 190.7
2018 – 232
2017 – 216.5
2016 – 351.7
2015 – 189.8
2014 – 276.1
2013 – 245.82