Tottenham in Manchester City an chelh

Pathianni zana English Premier League inkhel hmuhnawm takah Etihad Stadium a lenglut Tottenham Hotspurs chuan champion lai Manchester City an chelh a, 3-3 in an inhnehtawk. An muala an chak zawh loh danah City an lawm lo hle. Pathianni zana inkhel dangah Chelsea in kim lo chungin an mikhual Brighton an hneh a, tabla laihawl an luah.
Etihad Stadium-ah khingpui hautak hmachhawn tura lenglut Tottenham in bul an tan tha viau a, hma takah goal an thun. Bul an tan that ang bawkin a tawp an khar tha a, hun tawp dawn tepa Dejan Kulu-sevski goal thun hmangin tlawm an pumpelh a, point khat hlu tak an hmu.
EPL season tharah tlawm lova kal tluang rei ber an nih hnuin Tottenham an chechhe zawn a, khelh thum chhung an tlawm zawn hman hial. Vawi thum ngawt an tlawm zawn hnuin champion lai Manchester City an hmachhawn zui leh a, an tlawm leh mai a rinawm hman viau. City lakah hian goal thun thei Song Hueng-min chuan minute rukna lekah Kulu-sevski siamsak atangin hmahruaina goal a thun.
Hma takah goal an thun vangin phur viau mah se Tottenham an phur rei lo va, goal an chhuah zui thuai. Goal hmahruai an thun atanga minute thum hnu lekah goal hmahruai thuntu Son chuan an lamah a ti-goal palh a, City si phurh a sut sak. 1-1 a nih hnuin inkhel a hmuhnawm zui viau a, chawlhlawk hmain Pep Guardiola team in goal an thun belh leh hman. Minute 31-naah Phil Foden chuan Julian Álvarez siamsak atangin hma an hruai letna goal a thun a, 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui leh viau a, goal thum bawk hmuh belh tur a awm. Minute 69-naah Giovani Lo Celso chuan Son siam sak atangin goal a thun a, an si phurh a sut. 2-2 a nih hnuin inkhel a hmuhnawm leh zual a, goal thun tuma thapui an chhuah dun nasa hle. Goal a luh belh theih lawk loh hnuin hun tawp dawn hnaih minute 81-naah Jack Grealish chuan Haaland siamsak atangin hma an hruai nawn lehna goal a thun. He goal hmang hian an mualah an chak ngei a rinawm hman viau a, pahnihna an luah chhunzawm a rinawm hman.
Tlawm ngei tura ngaih ni tawh mah se Tottenham an beidawng duh chuang lova, champion lai lakah huaisen takin an inlan chhunzawm zel. Huaisen leh an thawhrim rah an seng a, minute 90-naah Dejan Kulusevski chuan Johnson siamsak atangin goal pawimawh tak a thun a, an si phurh a su zo. 3-3 a nih hnu hian City in goal thun theihna hum remchang an nei zui leh. Haaland leh Grealish te nawr tlangin goal thun theihna hun tha nei hman mah se referee chuan advantage a pek zet hnuin fault a ham leh tut Hooper thil tih dan hian mak tih a hlawh hle a, goal thun theihna hun remchang nei Haaland ngei pawhin mak a ti a, referee thutlukna si a sawisel zui nasa hle nghe nghe. City tantute chuan Cooper hian City a rawk a, point hnih a ruksak ang hialin an ngai a, a thutlukna hian sawisel a hlawh zui nasa hle.
An mualah an chak zawh loh vangin Manchester City hian pahnihna an luah chhunzawm thei lova, pathumnaah an tlahniam. An chak zawh loh lai hian an elpui lian Arsenal leh Liverpool in hnehna an chang a, Arsenal in hma an hruai chhunzawm laiin Liverpool hian City lehpelin, pahnihna an luah thar.
Kim lo chungin Chelsea an chak
Pathianni zana inkhel dangah team lian beisei phak lo Chelsea chuan kim lo chungin an mikhual Brighton & Hove Albion an hneh hram a, table-ah hma an sawn ve hret.
Sum seng hnem, player thar an lak luh nasat vanga beiseina sang tak nena an thlir Chelsea hian Stamford Bridge-a an mikhual Brighton lakah an khel tha viau a, minute 21 chhungin goal hnih an thun hman. Inkhel tan atanga minute 17-na lekah Enzo Fernández chuan Badiashile siamsak atangin hmahruaina goal a thun.
Hma takah goal an thun vangin Blues an phur viau a, goal an thun belh leh thuai bawk. Minute 21-naah Levi Colwill chuan Jackson siamsak atangin an goal hnihna a thun zui leh nghal zat bawk. Hma takah goal hnih an thun vangin chak tur a chiang deuh ruak hman. Si hniha hnufual tawh Brighton tan hian Facundo Buonanotte chuan minute 43-naah goal thunin an si phurh a sut then. Goal an chhuah hnu lawk hian Chelsea midfielder Conor Gallagher hnawhchhuah a ni a, hei hian Chelsea dinhmun a tichiang lo lehzual a, 2-1 a hmahruai chungin chawlhlawk hmang bawk mah se an chak zawh loh mai a rinawm hman.
Kim lo chungin second half hmachhawn mah se Chelsea in penalty an hmu hlauh a, an hmahruaina an tihzau theih phah. Chelsea tan hian hmahruaina goal thuntu Enzo Fernandes chuan minute 65-naah penalty a pet goal a, an goal thumna a thun. An goal thumna an thun vangin Chelsea an phur thar a, point thum hmu ngei turah an inngai tawh.
3-1 a an hnufual hnuin Brighton tan hian João Pedro chuan minute 90+2-ah an goal hnihna a thun leh na a, an si phurh zut zo thei lovin Chelsea lakah an tlawm zui ta thung.