Premier League club lian Tottenham Hotspurs chuan an manager thar atan Feyenoord Roterdam manager Arne Slot an duh a. Slot hian Tottenham pan a tum loh thu a sawi ve thung.
London club Tottenham hian an manager Antonio Conte an ban hnuin manager nghet an la nei lo. An manager lailawk atan Cristian Stellini an ruat a, ani pawh hi game li hnu lekah an ban zui ve leh nghal mai a. Stellini hmunruak hi Ryan Mason an luah tir. Conte awm loh hnuin Spurs hian beisei an phak lo leh zual a, Europa League pawh an khel phak dawn lo. Spurs hian Pathianni zanah Leeds United an hneh a, Brighton lakah Aston Villa an tlawm bawk a nih chuan Europa Conference League an khel phak tawk ang.
Tottenham hian an manager thar tur an zawng mek a, Bayern Munich manager hlui Jullian Nagelsmann dawr mah se an dawr hlawhtling thei rih lo. Dutch Eredivisie-ah Feyenoord champion puitu Slot hi an manager thar ni tura an duh ber a ni a. La thei mai dawnin in ngai hman mah se Slot hian Feyenoord enkawl chhunzawm a duh thu a sawi leh ta zawk.
Tottenham pan tum lo Slot
Get real time updates directly on you device, subscribe now.
Prev Post