Vinicius thlawptu Real player-te leh fans

Nilaini zan La Liga inkhel pakhata 2-1-a an mikhual Rayo Vallecano an hneh tumin Real Madrid player-te leh fans bakah match official-te’n thuziak leh kutbengin tunhnaia a vunrawng avanga Valencia khelmuala deusawh hlawh Vinicius Junior thlawpna an lantir.
Real player-te hian an kawr hnunga Vinicius-a hak thin number 20 inziak ha chungin khelmual an lut a, team pahnih captain ve ve pawhin racism dona thuziak awmna armband hrengin, team pahnih leh match official-te’n anti-racism message tarlanna thuziak chuanna banner nen thla an laho a, mipui lamin Brazilian forward thlawp lantirna atan kut an beng hluah hluah bawk.
Tarlan tawh thin angin, karliamta Pathianni zan khan Valencia khelmuala sikhat faia Spanish giants tlawm tumin home supporter-te’n Real mihang striker hi a vunrawng avangin nasa takin an deusawh a, chu chuan khelmual pawn lam thlengin nasa takin thawm a chhuah a, Spain rama racism huangtau lutuk chuan dem a hlawh hle.
Santiago Bernabeu-a an banner pakhat tarchhuahah chuan ‘Vinicius lamah kan tang vek e. A zozai ta’ tih a inziak a, banner dang pawh hmuh tur a awm nual.
He match-ah hian tunhnaia a thiltawn hrang hrangte avangin coach-in Vinicius a chawlhhahdamtir a, mahse, khelmualah erawh civil thuama inthuam (street clothes) inbel chunga lutin, a team mate rualin zahna chibai (standing ovation) an lo hlan a; khelmual chhungah official La Liga banner pawh hmuh tur awmin, tah chuan “Racist-te u, football-ah hmun in chang ve lo,” tih a inziak.
Tarlan tak angin, Nilaini zana Brazilian-in khelmual a luh loh chhan hi Valencia game-a red card a hmuh vang kha a ni lo a, kha red card kha chu Thawhlehni khan Spanish football thuneitu Spanish Football Federation (RFEF) lamin an hnukkir tawh a, a khup a tihnat deuh bawk avangin Vallecano hmachhawn tura inbuatsaihna training pawh a zawm lo a, coach-in a hahdamtir ve hrim hrim a, Bernabeu inkhel erawh Real Madrid President Florentino Perez kianga thu chungin a hmun ngeiah a thlir thung.
Real fans tam tak chuan Brazilian shirt ha chung leh Brazil scarf awrh chungin Nilaini khan stadium an pan a, Spain ram stadium ghrang hranga Brazilian player-in a vun rawng avanga hmuhsit leh deusawh a hlawh zozai an vuipui thu inziahna thuziak an lek sup sup bawk.
Fan naupang tak pakhat chuan, “Vini, ka chipui i ni a, nang hmuh hi ka tan thilpek a ni,” tih inziak a lek chhuak.
Inkhelh banah mihang player hian Instagram kaltlangin amah an thlawpna zozaiah lawmthu sawina a tarchhuak a, “In zavaiin ka hmangaih vek a che u. Ka lawm e, ka lawm e, ka lawm e,” a ti mawlh mawlh!
Bernabeu inkhelah darkar chanve khelh pelh hleka Karim Benzema goal khat leh hun pangngai tawp hma minute khat chiah la awma Brazilian Rodrygo tihluh hmangin Real an chak a; Rayo goal neihchhun hi minute 84-a striker Raul de Tomas-a thun a ni ve thung.
Kum 22 mi Rodrygo chuan a goal thun lawmin a chipui thlapwna a tilang a, a kutbawr lekchhuakin anti-racism symbol a tarchhuak.
Nilaini zan inkhel dangah mualneitu Espanyol nen 3-3-a inhnehtawkin Atletico Madrid chuan point hnih an hloh then a, he result avang hian khelh hnih la awmah Real Madrid chuan point 74 neiin pahnihna an luah chho a, Atletico lakah point khatin an sang ve ta thung.
Vinicius Junior lamah kirleh lawk ila, khatia, Pathianni zana Valencia khelmuala deusawh a hlawh hnu lawk khan La Liga president Javier Tebas chuan Valencia supporter-te dem tha hle hle mai ta lo chuan Brazilian zawk demna tih loh theih loh chhakchhuakin, racism chungchang sawiho tura meeting an kohah pawh Vinicius chu a inlan lo tih leh midang sawisel hmain mahni inenfiah hmasak thin tur tih a sawi zauh pek a, chu chuan Real forward a tithinrim zual a, Tebas-a tawngkam chuan sawiseltu pawh khawvel pumah a ngah hle.
Vinicius-a thinrim khan Spanish league chu racist-te intihneituna tiin a sawi ve zauh a, chu chu Tebas khan khati zawng khan a rawn chhanglet ta kha a ni a, Twitter lamah Tebas leh Vinicius inbeihna hmuhtur a awm hnuah La Liga president hian thupha chawiin, kha thu a sawi avang khan social media lama player beih a tumna a nih loh thu a sawi ta chul!
ESPN Brazil hnenah Tebas chuan, “Vinicius beih ka tumna a ni lo a, mahse, chuti zawnga mite’n an lo ngai a nih chuan thupha ka chawi e.
“Ka sawi tum zawk chu min puhna nena inpersan tak a ni a, thil awmdan sawifiah ka tumna satliah mai a ni e,” tiin.