Tourism-a tan lak tum dan hrilh

Tourism-a tan lak tum dan hrilh
New Delhi-a cham mek Tourism minster Lalnghinglova Hmar chuan Nilaini khan Union minister for Tourism Gajendra Singh Shekhawat a hmu a, Mizoram tourism hmasawnna tura hmalak mekna bakah hmathlir a neihte sawiin an inkawm.
Mizoram-in khualzin hipna tur tam tak a nei a, a bikin eco-tourism leh adventure tourism-ah India hmunpui ni tur khawpin theihna a awm tih Lalnghinglova Hmar hian a sawi a. Hun rei tak chhung Mizoramah tourism potential a awm thu sawi a ni tawh a. Tunah chuan theihna a awm tih sawi ringawt loin, potential haichhuak turin a tak taka thawh an duh tih a hrilh. Mizoram tourism hmasawnna tura a hmathlir tihhlawhtlin kawngah sawrkar laipui, a bikin Union Tourism minister puihna a mamawh dawn chauh tih a sawi a ni.
Kum 2024-ah tourist nuai 5 chuangin Mizoram an tlawh a, chu chu official state population atangin 50% deuhthaw a ni tih Tourism minister hian sawiin, tun atanga hun reiloteah Sairang thleng rel a luh tawh dawn avangin tourism hmasawnna kawng a inhawng zau sawt dawn tih a sawi bawk.
Union Tourism minister chuan Mizorama tourism hmasawnna atan theihtawp a chhuah pui tur thu a lo hrilh a. Tourist tam zawk hip thei tur chuan hmunhma neih that piahlamah state sawrkar leh mipui inbuatsaih a, rilru sukthlek thlenga inhawn a tul tih a sawi.
Project liantham leh rotling zel siam thin a tul thu leh, private investor-te thawhpui uar turin Mizoram minister hi a lo râwn a; sawrkar laipuiin tourism sector-ah SASCI atangin sum thahnem zawk dah a tum thu leh an ngaihtuah mek thu a sawi bawk.