Tourism Director-ah Indona
DP&AR (Civil Service Wing)-in May 22, 2026-a Mizoram Tourism Director charge la tura Pi R. Lalrodingi a ruatna dodala MZP-in May ni 25-27, 2026 chhung Tourism Dept. staff pisa kai tur an dan hnuah, nimin May ni 28 khan Pi R. Lalrodingi chuan chief minister hnenah banna a theh lut a, a banna hi pawmsak a ni.
Hemi chungchangah hian nimin khan MZP chuan thuchhuah siamin, hun lo la kal zel turah hetiang thil hi thleng nawn tawh lo se an duh tih an sawi a. Pensioner rawih nawn(Re- Employment) emaw service extension hian thalai tam tak hna zawng mekte a dal thin avangin, hetiang system hi MZP chuan a dodal zel dawn a ni, an ti bawk.
Tourism director charge la tura Pi R. Lalrodingi ruat chungchang hi nikum December thlatir atanga inmung tawh kha a ni a. DPAR mi lian pathum DPAR Minister, Commissioner&Secretary leh Joint Secretary te chuan chief minister proposal chu tunhmaa thil la awm ngai lo, kaltlangpui a nih chuan precedent tha lo hring thei a nih theih dan te, sorkar tan a sensitive dan leh “bad precedent” thleng thei a nih dan notesheet-ah an tarlang a, an hnawl tihna a ni.
Hemi hnu hian chief minister chuan DPAR mi lian pathumte ngaihdan chu a hriatthiampui thu sawi chungin, Mizoram tourism promotion atana Pi R.Lalrodingi pawimawhna leh tangkaina tanchhanin, deputation kaihhruaina siam rem (relax) theih nia a hriat thu a sawi a. Director atana Pi R.Lalrodingi ruat a nih chhan tur a sawi te chu, a tawi zawngin—Tun dinhmunah tourism department chhungah director hna chelh thei tura service hun chhung leh seniority kaihhruaina phuhruk thei officer an awm rih lo tih te; tun dinhmunah hruaitu thlak thut chu tourism tihhmasawnna tura hmalak mek heng PM EKTA Mall, Vantawng Falls-a Ropeway, Thingsulthliah-a Convention Centre etc. project kal mek te a buai phah thei tih leh, Chief Minister-a OSD leh Director a chelh kawp hian chak zawkin hmalakna a kal theih phah ang, tih te a ni. A service hi kum hnih chhung atan pawhsei ni se, one-time chauh leh entawn tur ni lo angin thupêkah chiang taka ziah lan ni se, tih chu chief minister note atanga hriat theihte a ni.
Eng pawh ni se, dan awm sa ni lo, siam rem chawpa kalpui tumna chu a tlawlh a, DPAR mi lian pathumte leh MZP te tanfung chu tihnghehin a awm a, tourism director ruat chungchanga indonaah hian CM chuan hnehna a chang zo ta lo a ni deuh ber e.
Tuna director dinhmun luah thei tur JD hian kum hnih zet a la nei a, kum hnih hnawh khah (stop gap arrangement) tumna hi a tlawlh tak si-ah chuan, JD hian Director charge hi a la rih mai dawn nge, eng tin nge kalpui a nih zel dawn tih chu thlir leh mek a ni ta a ni.