Tourism kalphung tharah mipui hmalakna a hmasa – Tourism minister

Mizoram sawrkarin tourism kalphung thar a ruahmanah mipui chet lak hnu ah sawrkarin a hnung a dawl thin zawk tawh dawn tih Tourism minister Lalrinpuii chuan a sawi.
Inrinnia Champhaia Hnahsin Kut kharna a hmanpuinaah Tourism minister chuan sawrkar hmalaknaa khualzin mite hip tumna chuan ngaia neihna a thlen thin a, hlawhtlin tawk lohna a nei thin tia sawiin, “Mizoram sawrkar chuan tourism-ah kalphung thar – community based tourism kalpui a tum a, mipui hmalaknaah sawrkarin an hnung a dawl thin dawn a ni,” a ti.
Hnahsin Kut buatsaih tura Champhai Nature Conservancy huaisenna leh Champhai mipui thawhhona tha chu ropui a tih thu a sawi bawk.
“Hnahsin Kut avangin mitinin Champhai pan an chak a, Kut tan hma hauha thlenna tur awm tawh lo chuan Kut hlawhtlin zia a lantir a, kalphung thara rourism kalpui sawrkarin a tum dan hlimthla lanna a ni,” a ti.
Champhai district chu hmunhma tihdanglam ngai lo hmun mawi, Mizo pi leh pu sulhnu tam ber awmna anih avangin khualzinmi hip turin theihna sang tak a nei tih Lalrinpuii hian a sawi a. Swadesh Darshan 2.0 hnuaiah tourism chawikanna tur hmalakna hrang hrang kalpui thuai tum a ni tih a sawi. Hnahsin Kut chu mipui phurna meichher hmanga chhit en a ni tawh a, nasa zawka alh zelin, India leh hmarchhak Kut zinga tha bera hlankai tum turin a chah
Tourism department-in Hnahsin Kut puala North Eastern Council atanga an sum hmuh cheng nuai 8 chu minister hian Organising Committee kutah a hlan a. Documents a fel hunah cheng nuai 2 dang pek leh tur a ni dawn tih a sawi.