Tourism lama Goa nena thawh dun dap

Tourism lama Goa nena thawh dun dap
Tourism minister Lalnghinglova Hmar chuan Nilaini khan Goa chief minister Pramod Sawant leh Tourism minister Rohan Khaunte chu Goa-ah a kawm a. Tourism hmasawnna tura state pahnih thawh dun chungchang sawipuiin, Goa-a Mizo leh hmarchhak mi chengte hamthatna tur a thlen bawk.
Tourism minister hian Mizoram chu khualzinte tana pan chakawm leh mawi, tourism lama hma sawn mek a ni tih Goa chief minister hi a hrilh a. A ram leilung mawina bakah tlang leh ruam chu adventure tourism leh sports tourism tan remchang leh theihna zau tak nei a ni a; Goa chu India rama tourism lama hmahruaitu a nih angin state pahnih thawhdunna in hmasawnna a thlen a beisei a, Goa atangin thil tam tak zir theih a ni dawn tih a hrilh a ni.
Goa Mizo Welfare survey atangin Goa-ah hian Mizo 1500 dawn an awm tih chief minister hi a hrilh a. Goa chu Mizoram bakah Northeast state dang thalai sing chuang tan eizawnna siamsaktu a ni chu lawmthu a sawi rualin, heng hnathawkte himna tur leh mamawh huna an koh theih tur Goa sawrkarin ruahman sak se tiin rawtna a thlen.
Goa chief minister chuan Mizoram Tourism minister hnenah tourism lama thawh dun theih a ni tih a sawi a; Mizo leh hmarchhak atanga hnathawkten harsatna an tawha an biakpawh tur CM Office-ah ruat nghalin, Mizoram Tourism minister nen a inhmelhriattir a, Goa Mizo Welfare htuaitute nena inhmelhriattir zui turin a chah bawk.
Goa Tourism minister pawh Nilaini vek khan Lalnghinglova Hmar hian a kawm a; state pahnih tourism hmasawnna atana thawh dun theihna hrang hrang an sawi dun.
Goa-in tourism atana digital platform neihah Mizoram-a tourism hmunhma leh event tarlan ve, tourism leh hospitality lama exchange programme neih, tourism kaihhnawih skill development lama thawhdun bakah state pahnih tourism tih lar kawnga thawh dun chungchanga Mizoram minister rawtna thlen an sawi dun a ni.
Minister Lalnghinglova Hmar hian Nilaini zana Goa Mizo Welfare buatsaih ‘Zo Zan’ a hmanpui a; Goa-a hnathawk Mizo thalaite taimakna a fak a, mi state-a cheng an nih anga mawi taka awm tur leh Mizoram lama an chhungte ngaihsak thiam turin a chah.