Tourist lodge aiah homestay

Tourism minister chuan nimin khan Vangchhia a tlawh a, PRASHAD hnuaia Cultural & Heritage Centre hmunhma a tlawhnaah thu sawiin khualzinte thlenna tur chungchangah, tourist lodge aia homestay ngaih pawimawh a nih tur thu a sawi a.
Tunhma deuh, Mizoramin tlawhtu khualzinmite kan la neih vak hma, chumi awmzia chu, inkalpawhna a la that vak loh lai i ti mai teh ang, khatih hun lai khan, tourism department lam chuan tourist lodge an sa tlut tlut thin a, a chhawr tangkaitu tura beisei khualzinmite an la tlem avangin tourist lodge tam tak chu a tlabal hman a, ‘kan chawi belh nasa’ te pawh a tih theih awm e. Sawrkar pawhin tourist lodge tam tak a pravatised nghe nghe a nih kha.
Information technology lamah hmasawnna nasa tak a thleng a, social media hmangin awlsam takin thlalak che thei thlengin a darh zung zung thei ta a, chutih rualin inkalpawhna changtlung zawkin min rawn luhchilh rup ta bawk a. Thawklehkhatah khualzin an lo pung thur thur a, ‘hmathlir neiin hma kan la’ te chu kan ti ve bawk tak na a, ‘thil tam tham’ la hmu ngai lo kan nihna a lo lang leh a, kan lo inrin leh beisei aia nasain min rawn chim ta hum hum mai a ni ber; khualzinmite hian.
Homestay hi tualchhungmite eizawnna tha tak chu a ni ngei mai, mahse khualzinmite hi homestay ringawt kan lo hlui chuan, mize inang lo tak tak an nih avangin, duhthlan tur (tourist lodge etc) kan chhawpchhuah hi chu a pawimawh dawn tho mai a. Tourist destination lun deuh-ah te hi chuan, tourist lodge changtlung tak hi awm thei zel se chuan duhthusam a ni awm e.
Homestay chungchangah pawh hian, ei leh in chungchangah, thianghlim leh mawihnai zawk kan ngaihtuah hram hram a pawimawh dawn hle. Khaw kar kawnglak hotel leh restaurant-te pawh hi, faina leh thianghlimna kawngah, thuneitu lam hian tun aia ham strict deuh dan an ngaihtuah te pawh a tul hial awm e. Kan hmanrua, bungrua, hmunhmate a ropui lo anih pawhin, faiin thianghlim tal se, chu chu khualzinmite pawhin Mizoram scenery mawi tak leh ‘traffic discipline’ ang thova an thehlar chak tur a nih a rinawm.