Transfer & posting-ah insawipui a nasa hle – DP&AR minister

Tunlai hian sawrkar hnathawk transfer leh posting an khawih nasa a, insawipui pawh a nasa hle tih Department of Personnel & Administrative Reforms (DPAR) minister K Sapdanga chuan a sawi a. Insawipui uar lo turin mipui a ngen.
MP inthlan dawna model code of conduct (MCC) avangin transfer and posting tih theih loh a ni reng a. MCC avanga tangkhang a lo tam nen, tunlai hian transfer and posting an ti nasa. Insawipui a nasa thin hle, tiin amah zawttu thuthar thehdarhtute a hrilh.
“Insawipui loh tawp chu thil har a nihna chin pawh a awm thei. Chutihrualin, harsatna an rawn sawi angin, an duh dan tihhlawhtlin sak vek ila, hnathawh ngaihna a awm lo,” DP&AR minister hian a ti. Sawrkar chuan ngaihtuahna uluk tak seng chungin transfer and posting a kalpui tih a sawi a ni.
Theih ang angin an inhrethiam tih sawiin, “Chutihrual chuan engtin nge Mizoram tan tangkai takin hna thawh theih a nih ang, tih kan ngaipawimawh ber lo thei lo,” a ti.