Ruihhlo vanga nunna chante kum 14 leh 58 inkar

Kumin July ni 24 thleng khan Mizoramah mi 1856-in ruihhlo vangin nunna an chan tawh a, kum 14 leh kum 58 inkar an ni.
Mizoram Excise & Narcotics (MEN) department-in 1984 atang khan ruihhlo vanga nunna zat hi kum tin an chhinchhiah a, an hriat theih chinah a naupang ber chu kum 14 mi, a upa ber chu kum 58 mi a ni.
Kumin bikah July ni 24 thleng khan mi 44-in ruihhlo vangin nunna an chan tawh tiin an chhinchhiah a, a naupang ber chu kum 19 mi, a upa ber chu kum 50 mi a ni.
Kumina vanduaina tawkte hi mipa 37 leh hmeichhia pasarih an ni a, an zinga mi 33-te chu heroin vanga nunna chan an ni. Mi dang 11-te chu heroin leh ruihhlo chi dang khawih pawlh an ni a, alprazolam leh ruihhlo chi dang vanga vanduaina tawk pakhat a awm.
1984 atanga kumin July ni 24 thlenga vanduaina tawkte hi mipa 1632 leh hmeichhia 224 an ni a, a tam ber chu spasmo proxyvon/parvon spas vanga nunna chan niin, mi 1161 an ni. Heroin vangin mi 266-in nunna an chan tawh a, damdawi ruihhlo dang vangin mi 429 an vanduai tawh. Mi 429-te vanduainaah hian heroin leh spasmo proxyvon/parvon spas a tel fur bawk.
Spasmo proxyvon/parvon spas hi mihring tana siam, damdawi pangngai a ni a, tun hma deuh chuan Mizorama ruihhlo ti thinte ruih ber a ni thin. He damdawi hluar lai hian vanduaina tawk pawh an tam. Hetiang damdawi hi a chhuak tawh lo.
Tunlaiin heroin a hluar a, heroin hi ruihhlo lar ber a ni mai thei. Tun hnaiah ganja a hluar a, tleirawl, kum lama la naupang zawkteah ganja hi a hluar nia sawi a ni.