“Transfer window” hawng mek

Football-ah transfer window inhawn lai a ni a,
footballer-te insawn theih hun a ni. Mizoram politics-ah pawh insawn hun lai a ni awm e.
Inthlan dawnah party danga insawn an pung thin a, kuminah pawh an insawn mek; ZPM-a lungawi lote an chhuak a, chumi hnuah MNF leh Congress-in candidate tur tihfel an han tum a, rin loh tak takin thil a kal mek. Mizoram politics-ah lut leh chhuak an indawt zut mai.
Congress party-in an MLA pakhat an chan dawn tih a chiang tawhah ngaih a ni a, chutih laiin MNF atangin AMC mayor hlui leh councillor hlui an chang dawn thung. AMC term liam taa mayor PC Lalhmingthanga chu Aizawl East II-ah Congress party candidate a ni dawn a, AMC term liam taa executive councillor Lalbiakthanga chu Aizawl West I-ah Congress candidate a ni dawn.
Congress party hian Palak bialtu KT Rokhaw an chan dawn a, ani hi MNF-in an chang ve thung ang.
Thu dawn danin, KT Rokhaw hi MNF nen thuk takin an indawr tawh a, mahse MLA ding lai a nih avangin term tawp dawnah lo chuan party chhuahsan lo turah ngaih a ni. Palak bialah hian MNF atanga ding tura ngaih mi pathum an awm a, anni hi an chhuak ang em tih chu hunin a la hril ang.
ZPM-in Congress atanga chhuak KS Thanga an chang a, chutih rual chuan an party atanga chhuakte zingah Congress candidate ni tur an awm; Lalsanglura Ralte chu Aizawl East I-ah a chiang tawhah ngaih a ni a, Dampa bialah Lalhmingthanga a chiang tawhah ngaih a ni.
Congress party leh PC an thawk dun dawn tih a chiang tawh a, Congress party nomination committee pawhin Tuichang chu PC president Vanlalruata dinna turah an dah nia hriat a ni.