Treasury bazar insawn dawn Intiamnaah AMC a din beisei

Treasury bazar insawn dawn
Intiamnaah AMC a din beisei
‘Treasury Bazar’ tih thin chu a awm tawh dawn loa, Tuikual South huamchhunga AMC Multi Complex-ah an insawnlut dawn.
Treasury Bazar Association chuan AMC Multipurpose Complex-ah insawn luh an tum tih an sawi rualin, AMC chu a intiamna tihlawhtling turin an phut a. An luh thlak rualin dan loa inzuar leh traffic tibuai theia inzuarte chungah hma an lak ngei an beisei tih an sawi a. ‘AMC hi kan nu leh pate an nih avangin kan thutna tura harsatna pawh an intiamna ang ngeia min tih sak kan beisei a ni,’ an ti.
Treasury Bazar atanga an insawnchhuah mai loh chhan chu, tuna an awmna leh an awmna tura AMC-in a sak chu anmahni pantu mipui tan pan a inawlsam hleih em piahlamah, tuna an awmna huamchhung local council-ten insawnchhuak lo tura an tih thin vangin an tan hmun dang pan a harsa niin an sawi.
Tunhnaia an thutnaa kangmei chhuakah, kangmei tuar theuh theuh PAMRA office kangah chief minister-in CM Relief Fund atanga cheng nuai khat a pek thu leh DM&R minister-in cheng nuai 5 a pek tur thu Assembly House-a sawichhuah a nih laiin, an tana zangnadawmna pek tur sawi a ni ve lo chu hriatthiam har an tih thu an sawi bawk.
Hetihlai hian Ningani tlai khan Aizawl mayor Lalrinenga Sailo hoin AMC hotute leh Treasury Bazar Association hruaitute hi an inkawm a. Boruak tha taka inbia in, a rang thei ang bera AMC Multi-Complex Tuikual South-a lut thla turin inremna an siam. Association hruaitute hian an mamawh leh tul nia an hriatte AMC-ah an thlen a ni.