Tribal leh OBC certificate uluk zawkin pechhuah ang

– Lunglei bawrhsap
Bawrhsap pisa atanga pekchhuah thin certificate hrang hrang, a bikin Tribal leh OBC certificate pek chhuah kawngah tihsual palh a pawi theih em avangin uluk lehzuala kalpui tum a ni tih Lunglei district bawrhsap R Lalthazuala chuan a sawi.
Bawrhsap thar hian Thawhlehni khan a office-ah Mizoram Journalists’ Association (MJA) Lunglei District member-te a kawm a. Bawrhsap pisa chu district inpui chan chang a nih avang leh mipui tana thawk an nih angin, mipui mamawh leh harsatna a rang thei ang bera chinfel sak an tum dawn tih sawiin, sawrkar thupek anga aikal inchinfel hun lai a nih avang leh thawktu indaih lohna avang erawh chuan engemaw chenah mipui hriatthiamna an mamawh dawn tih a sawi.
Kawng hmang nei leh felfai zawka hna thawh a nih theih nan thawktute hna chanpual siamrem mek a ni, tiin, inkalpawhna kawng tha a awm theih nana hma lak, chhiatna thleng chungchanga sawrkar atanga tanpuina awm thei rang taka pek chhuah, hriselna leh zirna kaihhnawiha hma lak, thingtlang lama bawlhhlawh thehthang leh sawngbawl dan kawng hmang nei zawk ruahman chu a ngaih pawimawh hmasak a ni tih a sawi. Lunglei khawpui inrelbawlnaah Lunglei Municipal Council-in thuneihna leh inkaihhruaina a neihte a nih dan tur taka kalpui theih nan thawh hona tha tak neih zel an tum tur thu a sawi bawk.
MJA chu mipui hnena sawrkar hmalakna puangzartu an nih angin, district hmasawnna atan district administration nen tha taka thawk tlang zel turin R Lalthazuala hian a sawm a. District chhunga thil thleng hrang hrangah amah bengvar a, finchhuah thin a, an ngaihmawh zawng a hnena thlen hreh lo tur leh thurawn pe thin turin a sawm bawk.
Lunglei MJA member-te hian an district leh Lunglei khawpui enkawlna kawnga an ngaihpawimawh zawng leh mipui mamawh an hriatte bawrhsap hi sawipuiin, hma lak ho dan tur sawi a ni.