AMC Ward VI corporator thlan turah ZPM-in candidate puang

Aizawl Municipal Corporation Ward No.VI corporator hmun ruak hnawhkhahna atana by election neih turah ZPM party chuan an official candidate atan H Lalremtluanga, Chanmari West an ruat.
Candidate hi Thawhlehni khan ZPM office-ah an party vice president W Chhuanawma’n a puang a. Party hruaituten fimkhur takin, ram leh khawtlang tana thahnemngai taka thawk tur an ngaihtuah hnuah H Lalremtluanga hi an thlang tih sawiin, he ward huamchhunga mipuiin duhsak taka khawngaihna vote pe theuh turin a sawm a ni.
ZPM president Lalliansawta chuan candidate hi tawngtaisakin thu a sawi nghal a. Aizawl North-III bialtu MLA, minister K Sapdanga’n thu a sawi bawk.
AMC Ward VI hian Chanmari West, Edenthar leh Hunthar Veng a huam a ni.
ZPM candidate H Lalremtluanga hi zirna lamah BA English-a zawh hnuin MSACS hnuaiah outreach worker hna, SIPMIU-ah assistant programme director hna leh New Horizon School vice principal hna a lo chelh tawh a ni. Rawngbawlna lamah pawh Presbyterian Kohhran Chanmari Bialah leh an branch-ah KTP office bearer hlun, tual upa a nih hnu ah kumina kohhran upa-a thlan thar a ni.