Trump-a lak luhnaah Jaishankar an India ai a awh

Indian External Affairs Minister S Jaishankar chu Thawhtanni zana Donald Trump-a lak luh inkhawm, US Capitol-a neihah a tel a. Prime Minister Narendra Modi-a’n president thar hnena lehkha a thawn pawh a kensak nia sawi a ni.
Jaishankar-a hi White House-a Trump-a a luh vawi hnihna tura ram dang hruaitu sawm tlem te zingah a tel a ni.
Prime Minister Modi-a chu Trump-a’n rinawmna thu a tiam hnua lawmpui hmasa bertu zingah a tel a. “Ka thian duh tak Donald Trump, United States president 47-na atana lak luh i ni hi ka lawmpui a che! Inhnaih taka khawvel hmelhmang thlak danglam tura kan thawh dun leh ka beisei a. I hun chhung hlawhtling taka i hman theih nan duhsakna ka hlan a che!” tiin X-ah a tar lang.
Trump-a lak luh inkhawmah hian Jaishankar-a hi tlar hmaah, President Trump-a’n president 47-na a nih hnua a thu sawina bul maiah a thu a. India leh US hi ram inkawmngeih, kawng hranga inkungkaihna nei an ni.
Jaishankar-a hi Trump-a lak luh inkhawm hmaa a puala tawngtai hun buatsaihah a tel bawk. “External affairs minister nia India aiawh leh prime minister palai nia vawiina Washington DC-a United States of America president 47-na lak luh inkhawma ka tel thei hi ka lawm a. Zing lamah khan St John’s Church-a Inauguration Day Prayer Service-ah pawh ka tel a ni,” tiin minister hian X-ah a tar lang.
Jaishankar-a hian US a châm chhung hian Trump-a sorkar ding mai tura mi pawimawh tak takte a kawm nghal bawk a. Ram leh sorkar hotu lak luh inkhawma external affairs minister-in ram ai a awh hi India-in a lo tih dan thin fo a ni.
Pathianni khan Jaishankar-a hian Washington hi a thleng a, Japanese Foreign Minister Takeshi Iwaya nen inkawm nghalin ram pahnih inkar thil hrang hrang – politics, venhimna, economy, technology leh mipui inpawh tawnna te an sawi dun.