Trump-a lak luhnaah Michelle Obama tel dawn lo

Trump-a lak luhnaah Michelle Obama tel dawn lo
Donald Trump-a lak luh inkhawmah an president hlui leh an kawppuite an tel vek tura ngaih a nih laiin first lady hlui, Michelle Obama erawh a tel ve dawn lo.
President hlui pathum – Barack Obama, Bill Clinton leh George W. Bush te chu an tel leh dawn a. Laura Bush leh Secretary of State thin, Hillary Clinton te chuan Thawhtannia Capitol-a Trump-a lak luh turah hian an pasalte ve ve an zui dawn tih an aiawhtute chuan an sawi.
“President Barack Obama chuan 60th Inaugural Ceremonies hi a tel dawn tih a tichiang tawh a. First lady hlui, Michelle Obama erawh a tel ve thei dawn lo a ni,” tiin Office of Barack and Michelle Obama chuan an puang tih The Associated Press chuan a tar lang.
Michelle Obama hi engvanga Trump-a lak luhnaah tel lo tur nge tih sawi lan a ni lo va. Kar hmasaa Washington-a president hlui, Jimmy Carter-a vuinaah pawh a lo tel lo tawh a. President hlui zingah Trump, Obama, Bush leh Clinton te chu an kawppuite nen theuh an tel a ni.
Bill Clinton-a pawhin lak luh inkhawm hi a tel ngei dawn niin a hun hman dan tur ruahmannaah a tel tih AP chuan a tar lang a. Hillary Clinton pawh a tel dawn tih a thupuangtu chuan a sawi.
George W. Bush-a pisa pawhin amah leh a nupui, Laura Bush te pawh an tel dawn tih an sawi.
Michelle Obama chauh hi kar hmasaa Washington National Cathedral-a Carter vuinaa tel lo a ni a, a pasal hi Trump nen an thu dun a, an inbia a, an nui dun bawk.
President hlui pathum leh an nupuite hi kum 2017-a Trump-a lak luh hmasakah kha chuan an tel vek a. Hemi tum hian Hillary Clinton-i chu 2016 presidential election-ah Trump a hneh lo nghe nghe a. Carter-a pawh a tel a ni.