Trump-a leh Chinese President Xi inkawm dawn

Trump-a leh Chinese President Xi inkawm dawn
Donald Trump-a leh Chinese President Xi Jinping-a chu Ningani hian South Korea-ah Asia-a intawhkhawmna pakhatah an inhmu dawn tih White House-in a puang.
Khawvela ram hausa ber pahniha hruaitute an inhmu tur hian ngaihven a hlawh a, tun hnaia sumdawnna thila an inbeih nasat avangin ngaihven a hlawh zual.
Tun hi Trump-a’n a pisa a luah leh hnua hmaichhana an inkawmna hmasa ber a ni ang.
Trump-a hian China-in leilung hausakna thil vâng bik a thununna a titawp lo a nih chuan November atanga Chinese bungrua an lak luhah chhiah dang 100%-a sanga lak lehah a vau lai mek a ni.
Ningania thuthar lakhawmtute a kawmnaah White House press secretary Karoline Leavitt-i chuan an inbiak tur thu hi a puang a. Gyeongju-a October 31 leh November 1 inkara Asia Pacific Economic Cooperation Summit (Apec) neih ruala inkawm tur an nih thu a sawi.
Trump-a chuan a hma khan President Xi-a nena an inbiak tur thu hi a lo sawi zauh tawh a, an kara neuh neuh awmte pawh ching fela thil tha a chhuah a beisei thu a sawi a. “Inkungkaihna tha tak kan nei a; mahse, tun tum kan inbe tur hi a pawimawh ber zinga mi a ni,” a ti.
Chinese Commerce Minister Wang Wentao-a pawhin Zirtawpni khan US nena indawr turah thil lawmawm lam a awm a beisei tih a sawi ve bawk.
Trump-a hian South Korean hruaitu, Lee Jae Myung-a pawh hruaitu dangte nena zanriah an kilho pahin a be bawk ang.
Trump-a hian Asia hmun dang pawh a tlawh dawn a, Pathianni hian Malaysia-ah Association of Southeast Asian Nations (Asean) summit-ah a tel ve dawn a. Hetah hian Malaysia, South Korea leh Japan hruaitute pawh a hmu dawn niin White House press secretary chuan a sawi.
Trump-a leh Xi-a hi kuminah vawi thum an inbe tawh a, a hnuhnung ber chu September kha niin US-a TikTok kalpui zel dan tur an sawi dun a. Hmaichhana an inbiak hnuhnung ber chu kum 2019-a Trump-a president hmasak hun lai kha a ni.