Trump-a thawn haw nih duh lova mahnia haw tam

Trump-a thawn haw nih duh lova mahnia haw tam
Donald Trump-a’n a vawi hnih nana president nih tuma a au hla pui ber pakhat, an rama dan lova ram dang mi lutte dap chhuaha hawtir a tumna chu a tlin hnuah beihpui a thlak mek zel a. Thawn haw bakah mahnia haw pawh tam tak awmin hei hian an ram chhunga hlawh pawh nasa takin a tipung.
A vawi hnih nana White House a luh leh phat atangin Trump-a hian a intiamna tihlawhtling turin hma a la nghal a, a president hmasak tir lamte aiin tun tuma a president-ah hian a let ruk dawna tam dan lova an rama pemte lakah thupek a siam hnem tawh zawk.
The New York Post chanchinbuin a tar lan dan chuan Trump-a sorkar hian US-a awm phal loh mipui dap chhuaha um hawnaah hian kal dan chi hnihin an kal a. Pakhat hi mi man leh thawn haw a ni a, hetah hian dan bawhchhiate an bitum deuh bik.
Pakhat chu mahnia haw duhte tana haw theihna ruahman a ni a. Hemi hnuah hian CBP Home app siamin haw duhte an inziak lut a, sum pek an ni a, vantlangah awareness campaign an thlak bawk.
Chhinchhiahnaa a lan dan chuan ram dang mi inhlawhfa 7,73,000 atanga maktaduai khat inkar velin an hna an chawlhsan tawh a. Hei hian a la thawkte tan hna leh hlawh a tipung nasa hle a. Tam tak chuan man chhuaha thawn haw an hlauh avangin anmahnia sorkara inziak lutin an haw hlawm a ni.
The Washington Post chanchinbu chuan ‘March thla atang khan ram dang mi maktaduai khatin an hna an chawlhsan tawh’ niin a tar lang bawk a, ‘hei hian hna a titam hle’ tiin a tar lang.
Chanchinbu hian “Ni khata darkar thawh zat nasa takin a tipung a, May-ah hian 0.4%-a pungin chu chu a sum zawng chuan $36.24 a ni a. Hlawh hian thil man sang zel pawh hliahin inhlawhfaten thawh hun chhung an ngah avangin sum pawh an la lut tam a ni,” tiin an tar lang.
Dan kengkawngtuten an man chhuaha tihluihna hmanga phal lohva awm thawn haw nih aiin mi tam tak chuan mahnia chhuahsan mai an thlang nasa hle a ni.