Trump-a’n Colombian a thawn kirten an ram an thleng ta

Trump-a’n Colombian a thawn kirten an ram an thleng ta
Colombian air force thlawhna pahnih, US-a an ram mi dan lova awmte phur chhuak tura tirhte chuan an khawpui, Bogotá an thlawk thleng leh ta.
Heng mite hi Pathianni khan US sipaiten Colombia an lo panpui tawh a, Colombian President Gustavo Petro-a’n an rama tum a phal lo va, thlawhnaa chuangte chu dan bawhchhia anga sawi chu a duh lo.
Hemi hnuah hian DonaldTrump-a’n Colombian bungrua an lak luhna man chu 25%-in a tisang dawn tih a puang zui a, nasa takin Petro nen an inbei zui nghe nghe.
Ram palai pahnih inbiain inremna an nei thei ta a, Colombia hian an air force thlawhna tira US-a pem lutte phur turin an ti ta a ni.
“Colombian an ni a, zalen an ni a, hmangaih an nihna an ram a ni,” tiin X-ah Petro chuan a tar lang.
An kut phuar lohva thawhna atanga an chhuk lai thlalak pawh a tar lang bawk.
Sorkar pahnih hi US sipai thlawhna chhunga an chuantirte an tih dana an thu inhmu lo ber an ni.
Colombia hian tun hma chuan US atanga an ram mi thawn lette an lo pawm ziah a, kum 2024 pawh khan US atanga mi 124 phur thlawhna chu an tumtir.
Pathiannia X-a thlalak darh pakhatah chuan US-a dan lova pem lutte Brazil-a thawn kirte hi thlawhna chhungah an kut phuar (handcuff) a ni a, an ke pawh che thei lova tih a ni bawk a. Hei hi a hmuhin Petro-a hi a lawm lo hle a ni.
Colombian hruaitute hian ‘Colombian-te hi hetianga thlawhnaa handcuff chungin an lo haw tur a ni lo’ tih a sawi a ni.
Petro-a’n an rama US sipai thlawhna tumtir a phal lo hian dan lova an rama pem lutte an rama thawn kir vek tuma hma la mek, President Trump-a a tithinrim hle.
Trump-a hian a sorkara hotute chu a rang thei ang bera Colombian bungrua US-a lak luhna man 25%-a tisang turin a tinghal a, chawlhkar khat hnuah 50%-a tihsan a ni dawn bawk tih a sawi a. Visa leh thil dang pawh a khuahkhirh nghal bawk.
Bogotá-a US embassy chuan Thawhtanni leh Thawhlehnia visa pek chhuah tur zawng zawngte chu a ti lo nghal.
Palaite an inbiak hnuah inremna a awm hnuah White House press secretary Karoline Leavitt chuan, “Colombia sorkar chuan President Trump-a ruahmanna an pawm ta a, dan lova Colombia atanga US-a pemte chu an kir vek dawn a, US sipai thlawhnate pawh tihkhawtlai leh phal chin bik nei lovin luhtir an ni ang,” tiin thu a chhuah zui.
Colombian Foreign Minister Luis Gilberto Murillo pawhin Washington nena an inmil lohna chu ‘chin fel’ a ni ta tih a sawi.
Murillo hian Colombian thawn lette chu dan ang taka dawnsawn a ni dawn tih a sawi bawk.
Central American leh South American ram hruaitute chuan Trump-a sorkarin an ram mi thawn kir a tum dan dawnsawn dan tur hi Honduras kaihhruaiin sawiho an tum a. Hetah hian President Petro pawhin a tel dawn thu a sawi tawh.