Trump-a’n Hormuz inhawng ti mah se Iran-in a la khar

US ​President Donald Trump-a chuan Iran nena inbiak tumna a awm lo tih a sawi rualin Strait of Hormuz chu hawn a ni tih a sawi a. Iran erawh chuan tuikawng pawimawh hi khar a ni tih a sawi thung.
Thla ruk chhung buainain reh lam a la pan theih loh laiin Thawhlehni khan tuialhthei man a sang leh viau a, US-ah ngei pawh kum tam chhunga a san ber lai tawngin rei tak a daih theih pawh rin a ni.
Inkahhai lailawk an puan chu Thawhtanni khana tawp a, Iranian hotu lian pakhat chuan an ram chu indawrna a kal fuh theih loh avangin sipai chakna neia che turin ‘an inpeih’ tih a sawi a, hetih rual hian Thawhlehni khan inbeihna thawm a awm lo.
“Islamic Republic of Iran nen inbiakna, indawrna leh ruahman lawk engmah a awm lo,” tiin Trump-a hian Thawhlehni khan Truth Social-ah a tar lang.
“Iranian lawng chawlhna kan dan chu a la awm reng a. Strait chu hawngin a pangngaiin a kal a. Tuia chil puah theihte laksawn leh tihpuah vek a ni,” a ti.
US leh Israel tangdunin Iran an beih atanga intan buaina hian thla ruk dawn a awh ta a, Tehran chuan strait kharin Washington chuan inremna tluantling awm tura inbiakna a that loh chuan thapuia kah lehah a vau.
US-in a duh ber pakhat chu Iran-in nuclear ralthuam a neih loh a ni a, mi thiamte chuan US sipaiten uranium tihchak sa dahna an kah chhiat avangin an tan ralthuam siam a harsa dawn tih an sawi.
Trump-a hian Gulf-ah boruakin hma a sawn zel tih a sawi laiin lawng kal vel tihbuai tumna a la awm reng.
United Arab Emirates defense ministry chuan Iran atanga ballistic missile pahnih kah chhuah a nih thu leh hei hi May 4-a Fujairah lawng chawlhna an kah hnua a hmasa ber niin an sawi.
A hnuah missile-te hi ‘lawng kal’ beih tumna nia hriat a nih thu X-ah tar lan zui a ni a, tuipuiah a tla ve ve.
Iranian foreign ministry thupuangtu, Esmaeil Baghaei-a erawh chuan UAE-in a ‘puhna’ hi ‘a dik lo’ tih a sawi thung.
UAE foreign ministry chuan Iran nena sumdawnna, thil an inthlang leh sum inpek tawn chu thu leh a awm hma an titawp tih a puang zui a. Tehran chet dan chu an chhehvel leh khawvel muanna leh himna boruak tichhe thei niin an sawi.
UAE leh Iran inkara bungraw phurh hi June thla khan Dubai-a Jebel Ali Port atanga chhunzawm leh chauh a ni a. Buaina a chhuah hnu lawk, March thla atang khan a titawp vek hman a ni.
United Kingdom Maritime Trade Operations chuan Thawhlehni khan Strait of Hormuz-a lawng kal atangin eng emawin a fuh tih thu an dawng a, engine room chhiain thawktu thi an awm niin an sawi.
Thawhlehnia report siamah Strait of Hormuz-a Thawhtannia lawng kal chu 10 pawh an tling lo.
Iranian palai, Mohammad Baqer Qalibaf-a chuan US-in June-a inremna lailawk an siama an tih tur ang an tihhlawhtlin hma chu strait hi an khar zel dawn tih a sawi niin an ram sorkar chanchinbuin a tar lang.
Inremnaah hian US-in Iranian lawng chawlhna a hawn te, tuialhtheia a hrekna hlih te, Tehran-in thil a neih a hrekte hlih te, kil hrang hranga indona tihtawp te pawh a tel.
June 17 khan memorandum of understanding ziakin ni 60 chhung awh tur a ni a, Thawhtanni khan tawpin Trump-a chuan pawh sei a sawi lo.
Indona avang hian mi sang tel thi tawhin a tam ber hi Iran ​leh Lebanon-a mite an ni a. Iran hian an chhehvel – Oman, Jordan, Kuwait, Israel, UAE leh ​Saudi Arabia-a US sipai hmunte a kap let ve a ni.