Trump-a’n indo tihtawp nana Iran rawtna pawm thei lo

President Donald Trump-a chuan Iran-in indona tihtawpna tura US-in rawtna a siamte a chhanna chu pawm theih loh a nih thu a sawi.
Iranian semi-official Tasnim news agency chuan Tehran-in rawtna chhanga rawt ve dang a neihte hi Pakistan kaltlangin Pathianni khan a thawn a, hetah hian kawng tinrenga indo tihtawp nghal te, US lawng sipaiten an lawng chawlhna an dan tihtawp leh Iran beih leh tawh loh tura thutiam te pawh a tel.
February thlaa US leh Israel tang dunten indona an kalpui hi inkahhai kalpui mek niin hei hian inbiak a tihawlsam beisei a ni a, inkahna erawh a awm zeuh zeuh thin tho bawk.
Kar hmasa tir lam khan Trump-a hian Iran indona hi a tawp thuai dawn tih a sawi nawn leh tawh a. Hetih lai hian Israeli Prime Minister Benjamin Netanyahu-a chuan Iran laka indona chu tihtawp a nih theih nan Tehran-in uranium a tihchak sa a khawlte chu ‘lak chhuah vek’ a ngai niin a sawi ve thung.
CBS-a 60 Minutes show-a an kawmnaah Netanyahu-a chuan, “Uranium tihchakna hmunte thiah ngai a la awm,” a ti.
Pathianni khan Iranian President Masoud Pezeshkian-a chuan Tehran rawtna hi tlang takin sawi lo mah se, “Hmelma hmaah hian kan lu kan kun ngai lo vang a, inbiak hi inpek emaw, hnungtawlh emaw tihna a ni lo,” a ti.
Trump chuan Truth Social-ah, ‘Iran ‘Representatives’ tia an sawite chhanna ka chhiar chauh a ni,” tiin a tar lang a. “Ka duh lo – PAWM THEIH ANI LO,” a ti bawk.
US chanchinbu, Axios chuan US-in indo tihtawp nana rawtna phek khata point 14 awmna a siamah chuan Iran nuclear enrichment tihtawp, hrekna hlih, Strait of Hormuz kaltlanga him taka zin theihna siam that ang a tel niin a tar lang.
Iran chuan Strait of Hormuz a dang chhunzawm zel a, hei hian tuialhthei man a tisang nasa hle.
US pawhin chuan Tehran-in rawtna a pawm theih nana nawr nan Iran lawng chawlhhmunte chu a dang a, hei hian Iran a tithinur hle.
Israel leh US sipaite chuan February 28 atang khan Iran hi an bei tan a. Inkahhai hi thla hmasa khan hman tan a ni.