Trump-a’n Iran sumdawnpuite chhiah 25% lak a vauna India-in tuar nep dawn

Trump-a’n Iran sumdawnpuite chhiah 25% lak a vauna India-in tuar nep dawn
US President Donald Trump-a’n Iran vau nana an ram nena insumdawn tawn ram dangte lakah chhiah 25% lak a tum chu India pawhin a tuar ve thei dawn a; mahse, New Delhi leh Tehran insumdawn tawnna hi $ tluklehdingawn 2 pawh tling lo a nih avangin ‘a nghawng nep dawn’ niin he mi lam hriain a sawi.
Iran-ah hian an khawpui, Tehran leh khawpui dangah sorkar laka lungawi lohna nasa taka lantirtute sorkarin tharuma a beih let avangin a vau nan Trump-a hian Iran sumdawnpui ramte lakah chhiah 25% a lak tur thu a sawi a, Thawhlehni khan ‘hman tan thuai a ni ang’ tih a sawi a.
Iranian sorkarin lungawi lote a beih letnaah hian mi za tel tun hnaiah an thi tawh a ni.
“Islamic Republic of Iran nena insumdawn tawn ram zawng zawng laka US chuan sumdawnnaah chhiah 25% a la nghal dawn a. He thupek hi thu tawp leh chiang a ni,” tiin Trump-a hian social media-ah a tar lang.
Trump-a vauna hi engtik atanga hman tan tur nge tih sorkarin hriattirna chiang tak a la chhuah lo va. India lakah kalpui a nih chuan US hian Russian tuialhthei a leisak avangin chhiah 50% a laksak sa bawk.
Hetih lai hian ram insumdawn tawnna hria chuan Trump-a’n Iran sumdawnpui ramte laka chhiah 25% lak a tum chu India-ah chuan ‘nghawng tlem’ chauh a nei dawn niin a sawi a. Iran hi India-in a sumdawnpui ram lian 50 zingah a tel phak lo va, 2024-25 khan $ tluklehdingawn 1.68 chauh sum chein ram dang nena a sumdawnnaa sum che zinga 0.15% chuang awrh chauh a ni a. Iran atanga thil a lakluh phei chu $ tluklehdingawn 0.44 chauh a ni.
“Iran nena sumdawnna hi tangka kum kal mekah hian chhan hrang hrang avangin a tlem zawngin a kal dawn niin a lang bawk,” a ti.
India hian Iran nena an insumdawn tawnna lian ber, tuialhthei a leisak chu May, 2019 atang khan Trump-a sorkar hmasain a hrek avangin a titawp tawh a. Khatih hun laia $ tluklehdingawn 17.03 vela insumdawn tawn thin kha tunah chuan a hniam tawh hle a ni.
Trump-a’n Iran a vauna hi a taka kalpui a nih chuan India pawhin a sumdawnpui lian zinga mi – China, Iraq, United Arab Emirates leh Turkiye chu a tuar na ber tur zingah an tel thung.
Iran hian kum 2024 khan bungrua $ tluklehdingawn 68 man dawn a la lut a, UAE atanga la lut tam berin $ tluklehdingawn 21 (a lak luh atanga 30%) man a la lut a. China ($ tluklehdingawn 17/26%), Turkiye ($ tluklehdingawn 11/16%) leh European Union ($ tluklehdingawn 6/9%) ten an dawt.
Indian bank-te pawhin khawthlang ramten an hreknaah harsatna a awm theih hlauvin sum leh pai inpeknaah pawh Iran nena inkungkaihna a neih thin a titlem hle tawh bawk.
Hetih lai hian India hi Iran-a Chabahar lawngchawlhnaah thuk takin inrawlhna a la nei a, ram pahnihte hian Gulf of Oman-a terminal tichangtlung turin kum 10 daih inremna an siam a, Trump-a sorkar chuan October, 2024 khan he lawngchawlhnaa hrekna a kalpui tur chu thla ruk a ngaihhnathiam a ni.