Trump-a’n strait hawn loh chuan power plant beihah vau

US President Donald Trump-a chuan Tehran-in darkar 48 chhunga Strait of Hormuz a hawn kim loh chuan Iran power plant-te chu ‘tihboral’ a ni dawn tiin a vau a, indonain ‘zuai lam a pan’ tih a sawi tuka a sawi a ni.
“Iran hian DARKAR 48 chhungin Strait of Hormuz hi a hawng kim lo a nih chuan United States of America chuan an POWER PLANTS hrang hrangte chu a kap ang a, a tiboral ang a, A LIAN BERAH TAN A NI ANG!” tiin Trump-a hian Inrinni (India-a Pathianni) khan social media-ah a tar lang.
Trump-a vauna hian US beihnaten Iran-a vantlang ni tin nun tibuai thei hmunhma beihah a tizau thei dawn a ni.
Indona avanga Iran-in khawvel tuialhthei leh liquefied natural gas phurh ngaa thena hmun khat vel kalna strait hi kharin kal hleih theih a ni lo va, khawvel pumah energy harsatna a thlen phah a. A khar deuh vek avang hian kar hmasa khan European boruakalhthei man chu 35% zetin a sang a ni.
Iran-a Khatam al-Anbiya military command headquarters chuan Pathianni khan US-in Iran tuialhthei leh energy hmunhma a beih chuan Tehran-in he biala US energy, information technology leh desalination hmunhma zawng zawng a beih ve vek dawn thu a sawi ve nghal.
Kar hmasa khan Iran hian Israel-in a gas field lian ber a beih chhan let nan Qatar-a Ras Laffan Industrial City, khawvela liquefied natural gas hmun ngaa thena hmun khat vel sawngbawlna hmun a kah avangin energy man a sang nghal a, chhiatna a thlen nasa a, siam that nan kum tam tak a ngai dawn a ni.
Inrinnia Trump-a vauna hi tun thlenga a la rapthlak ber a ni a. Indovin zuai lam a pan tih a sawi tuk maiah Iranian power hmunhma beih tumin US Marines leh sipai hmanraw dangte chuan Middle East an pan chhunzawm zel si a ni.
Iran-a power plant lian ber berte chu Tehran bula Damavand power plant (megawatt 2,868 capacity), Iran khawchhak lama Kerman plant (1,910 MW) leh Khuzestan province-a Ramin steam power plant (1,890 MW) te a ni.
Iran chhim lam tuipui kama Bushehr-a an ram nuclear plant awmchhunin MW 1,000 vel a siam chhuak thei bawk nia sawi a ni.
Tun thla tir lam khan Trump-a hian Iran power grid tihchhiat tum hi a sawi tawh a, ngaihthah zui a ni a. “Darkar khat chhungin an electric siam chhuah zat kan titlem thei a, siam that leh nan kum 25 vel a ngai dawn a ni,” tiin Trump-a chuan March 11 khan thuthar thehdarhtute a hrilh a, “Kan duh dan erawh chuan chutiang chu tih loh a ni ang,” a ti bawk.
Trump-a hian NATO tangrual ramte chu strait hawn theihna tura pui tura a ngenna an chhan duh loh avangin mi dawihzepah a lo puh tawh a. Tangruala tel thenkhat chuan an ngaihtuah dawn tih an sawi a, a tam zawk eawh chuan Trump-a’n anmahni rawn lova indona a tan chu zawm an hreh thu an sawi hlawm.