Trump-a’n US-Canada inkar lei hawn mai tur dan tum

Trump-a’n US-Canada inkar lei hawn mai tur dan tum
President Donald Trump-a chuan US leh Canada inkalpawhna lei hawn tur chu Washington-in a hmar lam thenawm ram atanga ‘a tul ang zawng zawng zangnadawmna an hmuh loh chuan’ danah a vau.
Canada-a Ontario leh US-a Michigan inkalpawhna tur, Gordie Howe International Bridge hi Ottawa-in ‘US chu a phu ang dikna leh zahna a pek hma loh chuan’ hawn a ni dawn lo tih Trump-a hian social media-ah a tar lang.
Lei hi a sakna sum Canadian sorkarin a tum vek niin a neitu nihna erawh Canada leh Michigan sorkarin a nei thung.
Prime Minister Mark Carney-a chuan Thawhlehni khan Trump-a nen ‘tha takin’ an inbia tih sawiin Canada chuan lei man hi an pe vek dawn tih a hrilh.
Carney-a hian president hnenah hian US leh Canadian hnathawkten an sak niin a thir (steel) an hman pawh ram pahniha mi ve ve a ni tih a hrilh bawk.
“Hei hi kan ram hnih inkara thawhhona lantirna lian tak a ni a, hawn kan nghakhlel hle a ni,” tiin Ottawa-ah Thawhlehni khan thuthar lakhawmtute hnenah a sawi.
Trump-a chuan Canada-a US palai, Michigan chhuak, Pete Hoekstra-a chu ‘tha taka indawrna kalpui tur leh lei chungchang pawh sawipui turin a ti’ niin a sawi bawk.
Ontario Premier Doug Ford-a pawhin Trump-Carney inbia chu a lawmawm thu a sawi a, lei chu ruahman lawk anga an hawn ‘theih ngei’ a beisei a, ram pahnih eibar atan a tangkai dawn tih a sawi.
Thawhtanni khan Michigan Democrat Senator Elissa Slotkin chuan ‘ruhrel lian pawimawh tak din hna thawhin zawh a hnaih a, kan state eibar tan chuan a rapthlak hle’ tih a sawi.
Slotkin-i hian X-ah, “Michigan-a sumdawnna man a sang dawn a, thil inpekna a him lo sawt dawn a, hna a tlem phah sawt dawn,” tiin a tar lang.
Trump-a hian hawn tur dan a tum dan hi eng ang nge tih hriat a ni chiah lo va; mahse, indawrna erawh kalpui a ni tih a sawi thung.
Detroit River chunga dawh, Canadian hockey legend Detroit Red Wings-a khel thin, Gordie Howe-a hming chawia a hming phuah lei hi enchhinna atana hawn leh kum chawhma lama pawm hman tum a ni a. Kum 2018 atanga dawh tan kha a ni a; mahse, lei dawh chungchangah hian kum tam tak chhung ram pahnih inkara neuh neuh a lo awm phah tawh.
A dawh nan hian Canadian $ tluklehdingawn 6.4 sen a ni.
A Truth Social-ah Trump-a chuan US-in ‘a zahve tal’ a nei tur a ni tih a tar lang a. Canada chuan Canadian leh US lama mi a nei ve ve niin a sawi.
Lei dawhtu pawl, Windsor-Detroit Bridge Authority hi Canadian federal Crown corporation niin sorkar ta ni mah se sorkar inrawlh phak lohna thlenga hna thawk thin an ni.
Trump-a chuan, “Canadian sorkar hian US president ka nih angin ‘America tana tha tur chauh’ ngaihtuah turin min beisei!” a ti a. “US-in kan pek angte zangnadawmna min pek hma loh chuan an hawng lo vang,” a ti.
President hlui, Barack Obama pawh US steel hmang lova dawh a phalsak avangin a dem bawk.
Hetih lai hian Canada lama Windsor, Ontario Mayor Drew Dilkens-a chuan an puhna hi a dik lo tiha sawi.
Thawhlehni khan Trump-a trade chief Jamieson Greer-a chuan Fox Business hnenah president-in social media-a a tar lan chu lei bik chauh a nih thu leh hawn huna sum che vel, toll ang chi pawh US hnena lut tur niin a sawi.
Lei dawh hi Trump-a president hmasak lai khan a bula mite chuan hna thawh titawp turin an lo ngen tawh a; mahse, khatih laia Canadian Prime Minister Justin Trudeau-a nen khan ram pahnihte eibara ‘inpawhna tur pawimawh tak’ tiin an lo hnawl tawh a ni.