Trump-a’n vantlang hriselna enkawl turin Covid inkharkhip sawiseltu thlang

Trump-a’n vantlang hriselna enkawl turin Covid inkharkhip sawiseltu thlang
US president ni mai tawh tur, Donald Trump-a chuan Covid avanga inkharkhip sawisel nasa tak thin, Jay Bhattacharya chu an ram vantlang hriselna lam enkawltu atan a thlang.
Trump-a hian Stanford University chhuak physician leh economist hi khawvela sorkarin a puiha biomedical research ti thin lian ber, National Institutes of Health (NIH) hotu atan a thlang tih a puang a ni.
Bhattacharya-a hi hripui len lai khan open letter sawi hlawh tak, Great Barrington Declaration tia an sawi ziaktu niin zau taka inkharkhip duh lotu a ni.
Thawhlehnia Trump-a’n a thlan hnuah hian public health team chu an kim ta a. January 15-a a sorkar thar lak luh tura cabinet 15 chu a lo tifel tawh a ni.
Thla tirah khan Trump-a hian a elpui thin, Robert Kennedy Jr chu US health department enkawl turin a lo thlang tawh a. Kennedy-a hi invenna lam ngai pawimawh a ni a, ei leh in siamna lama inkhuahkhirhna khauh zawk kalpui a duh thu a aupui nasat avanga fak hlawh a ni.
Trump-a hian thuchhuah a siamah Bhattacharya-a hi Kennedy-a nen thawk dunin ‘NIH chu Gold Standard of Medical Research ni turin American-ten hriselna lama chona lian tak tak an hmachhawnte an bei dun dawn’ tih a tar lang.
Bhattacharya pawhin X-ah hetiang chanvo chelh tura thlan a ni chu ‘zahawm’ a tih thu a tar lang ve bawk.
“American scientific institution-te hi miten an rin leh theih nan kan siam ang a, America hi hrisel zawkin kan siam leh ang,” a ti.
President thar tur hian Thawhtanni khan sorkar laipuia health officer thin leh conservative donor, Peter Thiel chu health department-a deputy secretary turin a lo tifel tawh bawk.
Bhattacharya-a hi kum li liam taa Covid hripui len lai khan a lar hluai a. October, 2020 khan Great Barrington Declaration an tih chu mi dang nen ziakin inkharkhip kalpui chu huap zau tak ni lo, hlauhthawnawm zualah chauh a tul dan ang zela kalpui ni se tiin an rawt a ni.
NIH ang bawk, US National Institute of Allergy & Infectious Diseases director hlui, Anthony Fauci chu hripui leng a hmachhawn danah a sawisel nasa hle bawk.
Lehkha an ziah lai hi Covid vaccine chhuah hma kha a ni a, khatih laia NIH Director Francis Collins chuan Great Barrington Declaration chu thil hlauhawm tak a ni tih a sawi.
Bhattacharya-a chauh hi Trump-a’n hripui len laia US public health agency sawiseltu a thlan a ni lo va. Covid-19 vaccine lak vek tur tih sawiseltu, Johns Hopkins surgeon Marty Makary pawh Food & Drug Administration (FDA) enkawl turin a thlang.
Physician, Republican congressman thin, Dave Weldon pawh vaccine himnaa hlauhthawn nei thin ni mah se Centers for Disease Control & Prevention (CDC) enkawl tura thlan a ni bawk.