‘Try That in a Small Town’ hla avanga puhnaah Jason Aldean a tawng chhuak

‘Try That in a Small Town’ hla avanga puhnaah Jason Aldean a tawng chhuak
Country star Jason Aldean chuan a hla thar ‘Try That in a Small Town’ avangin sawiselna a tawk a, he hla hi racist leh tharum thawhna thlawpna hla tia sawisel pawl an awm a, a zaithiam pui thenkhat pawhin he hla hi an sawisel a, chutihrualin amah tantu pawh an awm tho bawk. A music video a chhuak a, a video-ah hian American flag an hal alh lai te, police leh mipui inhmachhawn lai leh dawr rawk lai te a lang a, CMT pawhin nithum chhung an tihchhuah hnuah an chhuah chhunzawm duh ta lo a ni.
Tichuan, Jason Aldean hian Highway Desperado Tour a neih mekah Cincinnati-a Riverbend Music Centre-a show a neihnaahg, “Country music fans ka la hmuh ngai lo angin ka hmu a, hmuh a nuam viau e. Kar khat a rei duh ngar ngar hle mai, chutiang khatiang chu a ni tia min sawina te pawh ka hmu. Mahse, tute pawh hian ngaihdan an nei thei tih hi ka pawm dan a ni. I duh dan danin i ngai thei a, i ngaihdan chu a tihna tihna erawh a ni kher lo.
“American ka nihna hi ka chhuang a. He ram mi ka ni hi ka inchhuang bawk. Kan ram hi ka hmangaih a ni. Hetiang thil tlaktlai lo a lo thlen hma, hmana kan nihna ang kha chawi nun leh theih hi ka duh a ni. Ka ram hi ka hmangaih a, ka chhungte ka hmangaih a, humhim tur chuan engmah tihhreh ka nei lo tih hi tunah hian ka sawi duh a ni,” a ti a.
A thusawi zawh rual hian mipui chuan “USA! USA!” ti a auin an lo lawm a ni.
Aldean chuan, “Kan tunlai thil awmzia hi inhria tiraw u, thil in-cancel tir culture-ah kan awm a nih hi. I thusawi kha tu ten emaw an duh loh zawng a nih chuan, nangmah kha ‘cancel’ che kan tum ang, a awmzia chu i nun tihchhiat an tum tihna a ni, engkim tihchhiat sak vek che an tum. Tunkara ka thil hmuh pakhat chu country music fan-te hian hetiang thil lawilo hi kan hmuh tlang thei tih hi a ni. Country music fan-te hi ka la hmuh ngai loh angin ka hmu a, hmuh a nuam viau e. I chungah ka lawm takzet a ni,” a ti bawk.
A perform hmain ‘Try That in a Small Town’ chu live a perform dawn leh dawn an ngaihven thup tih a hriat thu sawiin, “Kei chuan, ‘E khai, ka show chhim tura rawn kal in ni a, tunge ka nih in hria alawm. Eng nge ka dinna tih pawh in hria’ ka ti mai a. Ka relhru ve ngai lo. Ka ngaihhlut ang min tawmpui a, kan innghahna a inang a, chu chu kan fate movie en tura kan hruai chang pawh a, tu emaw theater-ah rawn luta a rawn pawh kah chiam mai hlauhthawnna nei lo va awm kan duh a ni lawm ni? Chuvangin, tu ten emaw, ‘|hiana, kha hla kha zaninah i sa dawn em?’ ti a min zawh chuan ka chhanna chu hei a ho khawp mai. Mipui an tawng chhuak tawh a, tunkar chhung hian ring takin in au chhuak tawh a ni,” a ti.