Tual thihnaa mawhphurtu dem

Sumdawng intelkhawm pawl – Mizoram Merchant Association leh sawrkar hnuaia din Mizoram State Commission for Women chuan a hrang ve vea thuchhuah siamin, Aizawl Bazarpuia tualthihna pawi an tih thu an sawi a. Pawikhawihtu chu a phu ang hremna pek ngei an duh tih an sawi.
Mizoram Merchant Association (MIMA) chuan an sumdawngpui, V Lalhmingthangi (52), Tuikual ami, March 16 zana ama sumdawnna, New Market-a an kudama rawng taka thah a ni chu pawi an tiin, an thinlung a na hle a. A kalsan tak a chhungkhatte an lainatin an tuarpui tih a sawi.
Hetih rual hian V Lalhmingthangi thattu nia rin leh ni ngeia ngaih rang taka man chhuah a ni chu lawmawm an tih thu sawiin, tualthattu chu a phu tawk hremna, a na thei ang bera pe turin sawrkar an phut tih a sawi. He tualthihna hria a nih a, rang taka hma lak nghal a ni leh kar loa pawikhawitu man chhuah kawngah Home minister K Sapdanga leh Mizoram Police an chhuang a, Mizo mipui tan a thlamuanthlak an ti hle tih a sawi bawk.
Mizoram State Commission for Women (MSCW) chuan, V Lalhmingthangi w/o Zothanmawia, a dawr bungraw dahna kudam chhunga rawng taka thah a ni chu pawi a tiin, pawikhawihtua puh hmeichhia a ni lehzel chu pawi a ti lehzual tih a sawi a. Nunna chan ta kalsan a pasal leh a fanaute a tawrhpui tih a sawi a ni.
Home minister leh police-ten rang taka hma la a, pawikhawihtu man a ni chu fakawm a tih thu MPSW hian sawiin, tualthattu chu a phu tawk hremna pek a nih theih nan chak taka hma la zel turin an beisei tih a sawi bawk.